相信嚟到英國嘅朋友都會懷疑，明明英國係個島國，咩原因好似冇乜海鮮食？但其實諗深一層，英國的而且確有一種海産風行遠東，相信冇乜香港人會未食過，佢就係蘇格蘭蟶子！但奇怪嘅係，喺英國嘅海產市場又唔係成日有得賣，本地超市仲簡直絕跡，點解呢？正值十月開始，就係蘇格蘭蟶子嘅當造期，不如就同大家講下呢種被譽為「最被低估海産」嘅故事。
記得以前喺香港，每逢見到街市有新鮮又大隻嘅蘇格蘭蟶子（俗稱蟶子王）賣，都會買返屋企食。無論蒜蓉清蒸，或就咁用滾水焯一焯點鼓油Wasabi食，都係咁鮮甜肥美。但係嚟到英國，先發現英國唔係成日有蘇格蘭蟶子賣，喺本地超市更難得一見。歸根究底，係本地人好少食，所以接近九成都係用作出口，而且運到外國市場後，身價倍翻，越食越貴，對本地人來說就更加唔吸引了。
似剃刀又似劍 蘇格蘭人叫「spoots」
蟶子英文名為razor clam，因其修長外殼酷似舊式剃刀的刀柄而得名；學名Ensis在拉丁文中則解作「劍」。蘇格蘭人則慣稱其為「spoots」，相傳是因為蟶子受驚時會從沙洞噴出一道水柱而得名。
蘇格蘭出產的蟶子主要有兩個品種：Ensis magnus及Ensis siliqua，當中以俗稱pod razor的Ensis siliqua為主。每年十月至翌年二月為當造期，價錢最平而且最肥美。喺列斯，新鮮嘅大蘇格蘭蟶子通常會喺Kirkgate Market（但唔常見）或者海產店如Sea Men有得賣，一般價錢約£23/Kg，呢個價錢喺香港真係食唔到！
有本地美食網站形容，蟶子是蘇格蘭最被低估的貝類，鮮甜爽口，價錢相對帶子便宜。蘇格蘭西岸有漁民自設船隊捕撈，格拉斯哥一家海產出口商自2008年起便把克萊德灣（Firth of Clyde）的活海產運往中國、香港及新加坡。蟶子漂洋過海後身價倍增，以香港為例，蘇格蘭蟶子王大約200元一斤；喺日本亦非常受歡迎，所以漁民都寧願出口了。
三十年間 由43噸增至近千噸
蘇格蘭蟶子業近三十年，規模發展廿倍。1994年蟶子首次被納入蘇格蘭海洋漁業統計，當年上岸量僅約43噸，價值6萬英鎊。據蘇格蘭政府今年3月發表的諮詢文件，近年蟶子每年上岸量介乎550至947噸，上岸價值約420萬至760萬英鎊。
產區方面，克萊德灣是最大漁場，試驗區每年上岸量達183至340噸；福斯灣（Firth of Forth）次之。不過論產量，蘇格蘭並非全球之冠，荷蘭才是最大生產國，年均產量約4,630噸。但荷蘭蟶子通常以冷凍包裝出口，論口感和鮮甜度，當然同活口空運出口嘅蘇格蘭蟶子冇得比了。
很多人都知道，蟶子主要棲息於沙灘、泥質海灘、河口以及海灣的沙底中，傳統的捕捉方法，就係喺沙面搵一個鎖匙孔形的小洞，在洞口灑一撮鹽，蟶子以為潮水變鹹，便會自行探頭，此時便可乘機捉住。不過蟶子鑽沙速度極快，稍一遲疑便會縮回沙底，所以捕捉效率極低。
所以，蘇格蘭政府於2017年的文件承認，當時境內捕獲的蟶子幾乎全部以非法電捕的方式取得。為此，當局自2018年起展開電捕科學試驗。做法是由近岸漁船在海床拖動電極，令埋在淺沙中的蟶子鑽出，再由潛水員人手拾取。參與試驗的漁船少於30艘，須安裝遙距電子監察系統，每日上岸量上限為450公斤，每年只准作業110日。政府今年3月20日至6月12日就應否設立商業電捕漁業進行公眾諮詢，目前結果尚未公布。
點煮好？
十月就快到，又係蟶子當造嘅季節，咁究竟點煮先好食？
經驗所得，蟶子梗係越大隻越好，一公斤大約有十隻至十四隻，因為大隻洗得冇咁辛苦，雖然其實蘇格蘭蟶子本身已經好乾淨，就咁中間劏一刀就幾乎已經可以用水沖乾淨了。煮嘅方法，一般香港人應該比較鍾意落蒜蓉粉絲蒸，通常大火只需蒸兩至四分鐘就夠，四分鐘以上就老了；如果打邊爐的話，則只需約分半鐘。另外選購時可輕觸外殼，會收縮或活動的才新鮮。
其實除咗蘇格蘭外，英國威爾斯亦係熱門產地；另外對面的愛爾蘭因為海水夠冷，亦盛產野生蟶子，喺英國魚市場都會搵到。只係有啲師傅講，愛爾蘭蟶子泥味比較重，所以論品質，始終都係蘇格蘭蟶子好啲。
