內政大臣馬曼婷（Shabana Mahmood）周一（11月2日）喺下議院公布「贏取永居」（earned settlement）最終方案。大部分合法移民申請無限期居留權（Indefinite Leave to Remain，簡稱ILR，即永居）要等嘅年期，由五年倍增至十年。不過對持BNO簽證嚟英國嘅香港人嚟講，最重要嘅係呢一句：BNO港人嘅定居途徑「維持現狀」，相信會令唔少人鬆一口氣。
馬曼婷喺聲明入面列明，有幾類人嘅定居途徑會同而家一樣，包括「香港英國國民」（Hong Kong British nationals）、海外軍人、同英國有特殊聯繫嘅人士，以及Windrush等舊有路線。換言之，BNO港人繼續可以喺英國住滿五年申請永居，再過一年申請入籍，即係大家熟悉嘅「5+1」。
其實政府去年11月推出諮詢嗰陣，已經表明會保留BNO五年路線。但當時嘅做法係將BNO納入新框架，以「十年基準扣減五年」嘅方式處理，令唔少港人擔心要同時符合新門檻。今次內相用「維持現狀」嘅字眼，算係食多粒定心丸。
其他人點計？
新制之下，要等幾耐睇「貢獻」決定。年薪超過5萬英鎊人士，以及醫生、護士、教師等公共服務人員，仍然可以五年申請。年薪超過12.5萬英鎊或持最高級別人才簽證嘅，三年就得。其餘年薪低過5萬英鎊嘅人，一律要等十年。
所有申請人都要過四個「基本關口」：冇刑事紀錄（包括海外定罪）、英語達高水平、冇拖欠公帑，同埋有至少三年國民保險供款。違反移民規例嘅人，輪候期會推遲到二十年；曾經領取福利嘅，申請前要連續五年冇倚靠政府援助。已經喺英國嘅護理員就有過渡安排，遵守簽證條件、年薪至少25,000英鎊嘅，可以保留五年路線。
港人最關心：英語B2、收入門檻仲有冇？
不過有一點仍然未清楚：上面四個「基本關口」，會唔會套落BNO港人身上？
諮詢期間，政府曾經提出BNO港人都要符合強制要求，包括英語由B1（中級）提升到B2（中高級），以及三至五年內年收入要高過12,570英鎊。關注組織香港監察（Hong Kong Watch）當時做咗問卷調查，兩個禮拜內收到超過4,500份回應。今年2月，有36名跨黨派國會議員聯署去信內相，警告新要求可能令接近九成成年BNO持有人唔合資格定居。網上請願亦有超過十萬人聯署。
今次聲明話BNO路線「維持現狀」，字面上似乎即係沿用現行要求：連續居英五年、英語B1，同埋通過「英國生活測試」（Life in the UK Test）。但正式細節要等內政部修訂移民規則先作準，現階段官方仍未就BNO嘅具體門檻公布條文。
另外要留意，內相喺聲明中重申，定居規則係以批核嗰陣為準，唔係以入境嗰陣為準。所以就算而家話維持，最終都要睇條文點寫。
有香港刑事紀錄要特別留意
值得一提，英國移民法一向將海外定罪計算在內，呢點喺現行制度已經存在，今次新方案亦冇提出修訂。按現行規則，申請人如果喺英國或海外被判監禁或緩刑12個月或以上，申請「必須」被拒。
英國傳媒《Metro》9月報道，近月至少有12名因2019年社運被定罪嘅港人被拒發BNO簽證，當中有人曾因暴動罪服刑。內政部喺拒簽信中引用香港法院判詞，認為有關行為喺英國同樣屬刑事罪行。內政部指，有關刑事紀錄嘅一般規則同樣適用於BNO申請。
不過，內政部嘅BNO指引承認，部分海外定罪喺英國冇對應罪名，或者刑罰明顯重過英國同類罪行，呢類情況唔應自動構成拒絕理由。曾經有港人以程序不公為由司法覆核成功。所以，若申請人有相關紀錄，申請前應先諮詢熟悉BNO個案嘅移民律師。
BNO港人而家可以做啲乜？
正式規則出台之前，現行BNO定居安排繼續適用。準備申請永居嘅港人可以留意幾件事：保持連續居英紀錄，避免長時間離境；保存好國民保險供款紀錄同糧單；預早準備英語證明同考埋個Life in the UK Test；避免拖欠稅款、罰款或者其他欠款。如果有個別疑問，應該諮詢註冊移民顧問或者律師。
