《種子新聞》有個「香港人店」系列，承蒙各位讀者支持，反應一向都唔錯，但喺列斯開嘅香港人餐廳都俾我哋訪問得八八九九。既然我哋做呢個平台，原意都係凝聚身居英國（特別係列斯）嘅香港人，咁不如新增一個「列斯港人系列」嘅欄目，訪問一啲有故事嘅列斯街坊。今次第一炮，我哋就訪問咗一位喺「立場新聞」及「眾新聞」等平台寫過專欄，以及出版過幾本小說的資深傳媒人。近來佢參加咗由台灣鏡傳媒舉辦嘅【第五屆鏡文學百萬影視小說大獎】，需要大家嘅支持，投佢嘅作品《天災人禍》一票，各位街坊記得支持吓。
種（種子新聞） 袁（袁海鈞）
種：不如先介紹吓自己？
袁：大家好，首先感謝《種子新聞》。我喺列斯定居，一直都有follow你哋，估唔到你哋竟然會訪問我，真係好感激。我以前喺香港做過某報章嘅主筆，亦都用過唔同筆名喺網媒好似「立場新聞」、「眾新聞」及「獨媒」等平台寫過文章；以前又出版過幾本小說。不過今次參加【第五屆鏡文學百萬影視小說大獎】，我就用咗另一個筆名，叫袁海鈞。
種：因乜事要改名，用返以前啲筆名應該有少少知名度？
袁：今次參加比賽呢本小說，其中一個主角係消防員，故事暗示佢曾經參加過「宏福苑」大火救災而患上創傷後遺症。另一個主角係曾經因參加社會運動而入獄的天文學專家，後來仲講到個政府以「以災亂港」為原因捉咗佢，個保安局長係大奸角，結局仲要落咗成個政府嘅面。所以我都係用返其中一個主角嘅名「袁海鈞」做自己個筆名算了。
種：咁又係，以依家香港政府嘅尿性，如果你個故事有迴響，佢哋實會「釘死」你。你可以先介紹吓你個故仔嗎？
袁：好的。我個故仔叫《天災人禍》。故事分兩部分：第一部分係關於「天災」。故事講述香港受到一個類似當年橫掃菲律賓嘅世紀風暴吹襲香港，主角許信怡係一名消防隊長，奉命入到赤蠟角機場嘅空難現場救人；第二部分係「人禍」，就係講政府嘅官僚、偏見，以及將政治考慮凌駕於人命之上。
因為呢個由小說徵文比賽，叫做《百萬影視小說大獎》，所以簡而言之，你可以想像呢個故仔係一套災難片。
種：你寫呢個題材，我估你嘅創作念頭都係因為「宏福苑」大火？
袁：絕對係啦，上年年尾有事返咗香港，咁啱就撞正「宏福苑」大火，因為我以前住北區，平時搭車都會經過宏福苑。眼見成個屋苑變得火光熊熊，嗰種震撼法係非常難以形容。後來再聽埋政府、奸商同啲政黨互相推卸責任，一時又話關碌竹事，一時又話啲義務救災者「以災亂港」，真係嬲到震。後來返到英國，見到有呢個徵文比賽，就決定用呢個題材寫一個故事，只係涉及嘅災難唔係「火災」，而係一場世紀災難級別嘅「怪獸級風暴」。
因為呢個比賽係今年四月尾截止，所以寫嘅時候，宏福苑嘅情況尚未進化到依家咁荒謬，好似政府食晒災民的捐款，又從來未見過保險公司嘅人出嚟解釋點賠法，反而政府堅持要拆晒成個屋苑，嚇啲退休阿公阿婆賣業權，仲話要立法唔係就充公一蚊都冇。如果呢個比賽遲啲先舉行，我估我個故仔會改名做《人禍天災》，或者直接叫《人禍》。
至於點解主角係個消防員，同樣係關宏福苑大火事。以我所知，香港消防員對應呢類大災難，裝備非常落後。佢哋喺火海中救出受害者，基本上係搵命搏。而喺「宏福苑」大火中，亦都有一位消防員不幸殉職。所以呢個故事亦係向前線消防員致敬。
種：我有幸睇過你個故仔，雖然總算係Happy Ending，結局都叫做大快人心，但其實喺風災中喪生嘅市民，到最後都冇人需要負責。
袁：對，因為現實都係咁。
種：咁講返轉頭，點解你會有寫小說嘅念頭？
袁：得閒囉（笑）。以前喺香港，基本上係冇私人時間，特別係我呢啲有家庭嘅人。加上大家都經歷過香港嗰種有返工冇放工嘅日子，仲邊有心情寫小說？而且大家都明白，依家已經好少人會睇書了，如果講錢，係冇理由會花幾個月時間走去寫書的。但嚟到英國之後，即使要做Full Time，空餘時間遠比以前多，所以可以做啲自己鍾意做嘅嘢囉。就好似你《種子新聞》咁，廣告又冇，Sponsor又冇，課金都冇，想搵錢就唔會做啦。
種：（笑）我諗好多決定嚟英國嘅朋友，心入面都係希望可以過自己想過嘅生活。起碼同香港比，英國嘅生活壓力冇咁大，可以做返啲自己想做嘅嘢。
袁：冇錯。其實我參加呢個比賽之前，曾經用英文寫過另一本小說，然後搵本地嘅Literary agents（文學經紀人），睇吓有冇機會喺英國出版小說。始終英文出版市場比中文市場（唔計大陸）大。雖然用英文寫作更加之難，但起碼仲有機會。喺香港，依家出版社幾乎唔會再出小說了，除非你已經超級有名。
種：Literary agents係乜嘢嚟？
袁：簡單講，就係作者嘅經理人。以前喺香港，如果你想出版一本小說，通常係直接同出版社聯絡。但喺香港以外嘅市場，出版社只會直接同Literary agents對口。作者想出書，第一步就係四出聯絡呢啲Literary agents，俾你嘅出版計劃俾佢。如果佢有興趣，就會代表你聯絡出版社。
種：呢個制度有咩好處？Literary agents容易搵嗎？
袁：有好有唔好啦。好處係，作者只需要專注寫好自己嘅作品就夠了，其他商業上嘅問題有人會幫你解決。舉一個最成功嘅例子，就係《哈利波特》嘅作者JK Rowling，當年佢出版第一本《哈利波特》小說之前，只係一個寂寂無名嘅新作者，《哈利波特》亦俾出版社reject過好多次。後來有一間當年都係好細嘅Literary agents入面，有一位叫Neil Blair決定同佢合作。而JK Rowling同Neil Blair，後來就被評為史上最成功嘅作者同Literary agents組合。《哈利波特》獲得現象級嘅成功，Neil Blair功勞非常大。
Literary agents嘅好處，就係佢哋嘅本業就係發掘有潛質嘅作品，所以比較願意同新作者合作。不過，喺英語市場，新作者嘅數量極多，可能你一番心機寫好一本書，佢哋睇完你個proposal一眼，就直接Reject你。至於同你分錢（本地15%、海外20%佣金）已經是後話了。
要搵Literary agents其實好容易，網上一search就已經有好多了。通常佢哋會寫明佢間公司會接受邊種類型嘅作品。但要留意，有啲agents會要求事先向你收取閱讀費（Reading fees）或編輯費之類的費用，咁呢類agents就九成九係呃人。
種：咁如果搵Literary agents唔成功，仲有冇出路呢？
袁：有。可以透過Amazon KDP (Kindle Direct Publishing)自己出版。老實講，依家AI咁方便，以前出版社嘅工作例如翻譯、設計及教對等都可以用AI完成了，之後你可以將你嘅作品上載到Amazon KDP，然後直接賣俾Amazon嘅讀者。不過因為依家AI太過泛濫，Amazon KDP上有超多用AI寫嘅垃圾作品，咁你本書就好容易被淹沒了。
不經不覺，呢個訪問已經超長，其實我仲有好多問題，好似佢點解會選擇喺列斯落腳等問題，唯有留返下次了。
最後，就如上文所說，袁海鈞呢本《天災人禍》需要大家支持。依家喺鏡文學網站入面，可以試閱佢呢本作品。方法係登入以下網站，申請成為鏡文學會員，然後搵《天災人禍》。如果你覺得滿意，最好就梗係幫手投呢本作品一票啦。
【第五屆鏡文學百萬影視小說大獎】投票網址：
