以前喺香港，屋企人教落話啲水喉水要煲過先好飲，但嚟到英國，見啲本地人打開水龍頭就咁直接飲；再者，我哋平時去餐廳飲tap water，都其實係未煲過嘅水喉水，但又好似冇肚痛，原因呢？唔講唔知，其實香港水務署供應嘅自來水，英國一般受到充足的管理，英國之所以贏，主要係贏在最後一程。
記得以前喺香港，打開水龍頭流出嚟嘅水，間唔中就有異味；再加上諸如「鉛水事件」等偶有發生，所以大家都習慣將水煲滾先敢飲落肚。但事實上，香港嘅自來水本身已符合世界衞生組織標準，可以直接飲用，只係因為有兩個問題，先令到大家唔敢直接飲。
第一，就係因為香港數係高樓，食水要先泵上天台水缸儲存，再靠重力流落各戶。水喺缸入面停留耐咗，消毒用的餘氯會減少，如果大廈冇定期清洗水缸，就有機會滋生細菌或積聚沉積物。
第二，當食水由街喉流到大廈內，喉管就會由業主或管理公司負責，而呢個就係最主要嘅原因，例如舊樓喉管可能生鏽、老化，2015 年公屋「鉛水事件」就係因為內部喉管焊料含鉛，於是大家唔只要煲，仲要過濾完再過濾先敢飲用了。
英國少高樓大廈
但嚟到英國，最主要係高樓大廈較少，英國住宅廚房嘅冷水喉通常直接連接街外總喉，水未經任何儲水缸，餘氯保持穩定，水質同出廠時差不多；另外，英國設有Drinking Water Inspectorate，會獨立監察各水務公司，抽驗合格率長期接近 100%。因為一出事水務公司就會被重罰，所以會非常小心處理。
不過，如果想飲熱水的話，就一定要事先煲滾佢了，因為䁔水會留在loft tank或熱水爐內，就有機會滋生細菌了。
至於另一個香港人特別關心的問題，就係「軟水」同「硬水」。因為例如喺英格蘭東南部、倫敦、東英格蘭、中部一帶，雨水會滲過石灰岩同白堊層，所以含有大量礦物質，飲起嚟感覺較重，再加上硬水易積水垢，有時又好似有層油喺面，故唔少香港人都會安裝「軟水機」。但其實，軟水機會用鈉取代鈣鎂，令水嘅鈉含量上升，所以如果要飲用，官方建議都係唔好經過軟水機，軟水機過濾後嘅水，留返沖涼好了（傳聞硬用水沖涼會令兒童濕疹發作，但未有定論）。
當然，如果你依然頂唔住硬水陣味，咁就只有去超市買水了。
康和郡自來水有雜質
講到呢度，英國嘅自來水又係唔係百份百可靠？答案當然唔係。今日BBC報道咗一宗新聞，講述康和郡（Cornwall）一對夫婦家中自來水，去年底突然出現不明雜質，化驗更發現酸鹼值超出法定標準，至今佢哋已依靠樽裝水生活超過四個月。
據報，事主的住所原本接駁了一條維多利亞時代的舊供水管，為改善水壓，佢哋三年前向西南水務（South West Water）支付近6000英鎊，改為接駁主水管。然而去年12月，新的供水系統出現問題。廚房水龍頭嘅出水開始含有微粒，把所有裝有濾網的水龍頭都塞住，後來連boiler內嘅加熱組件都積滿碎屑而需要更換。
事後，西南水務對佢屋企嘅食水進行測試，發現酸鹼值（pH）達10，高於規定的6.5至9.5。
西南水務發言人表示，出事原因可能係供應該住所的一段喉管內水流較慢，當水長時間滯留喉管內，有時會改變水的特性，包括酸鹼值。不過，發言人拒絕透露呢啲徵粒到底係乜嘢嚟，可見英國嘅自來水都唔一定可靠。
雖然筆者住喺軟水區所在嘅列斯，但依然習慣將水煲熱後先飲。其實講到尾都係習慣，上世紀六十年代，香港制水，不單、水質較差，而且要留定一桶二桶，咁自然要煲滾先敢飲了。同樣地，本地人自細飲慣自來水，即使係硬水都照飲冇問題，仲有傳聞（未經證實）話飲慣硬水會略降低心血管疾病呢。
