英格蘭東北部一名孕婦懷孕七個月時，患上可以致命嘅妊娠併發症，但兩度被醫院叫返屋企。孕婦回家後，始證實腹中女嬰已經去世。但更令家人難以接受嘅係，院方確認 BB 冇咗之後，竟然冇即刻安排幫佢引產，反而叫佢自己打電話「預約時段」再返嚟生。涉事醫院承認護理「未達標準」，仲承認如果當初冇放佢出院，女嬰本來可以活著出世。
事主白丹妮（Danielle Brown）今年31歲，住喺北泰恩賽德（North Tyneside），係一名咖啡師。2023年2月，佢懷孕七個月，一朝醒嚟發現塊面同手腳都腫晒，於是去醫院睇，結果診斷出患上妊娠毒血症（pre-eclampsia）。因呢個病對媽媽同腹中女嬰梅茜（Maisie）都有致命危險，所以院方當時亦對女嬰嘅心跳狀況表示關注。
白丹妮之後被轉送去紐卡素皇家維多利亞醫院（Royal Victoria Infirmary，簡稱 RVI）。據佢憶述，當時一位顧問醫生講明佢要留院直至生產，但係於第二日另一位醫生評估過後，院方竟喺2月14日安排佢出院。
再返醫院 BB 已冇心跳
出院翌日，白丹妮覺得唔舒服，打去醫院產科評估部，對方竟然話佢可能只係腸胃唔妥。佢堅持要求檢查，返到醫院等咗大約90分鐘，院方最後話搵唔到梅茜嘅心跳，證實女嬰已經去世。
但更離譜嘅係，院方並冇即刻幫佢引產，只係俾咗本有關喪子父母嘅小冊子，並叫佢打電話約時間再返嚟生。白丹妮話院方講嘢完全冇同理心，令佢好嬲。佢嘅伴侶米安東（Anthony Miller）今年34歲，形容等待嘅日子「好恐怖」：要瞓喺床上，摸住個仲感覺到胎動、但BB已經冇咗生命嘅肚。
兩日後，即2月17日，白丹妮捱咗大約10個鐘陣痛，終於誕下梅茜。佢話見到女兒嗰刻百感交集，形容女兒「好完美」，但又感嘆自己第一次抱 BB，抱嘅竟然係已經離世嘅女兒。兩公婆離開醫院時仲要行過產房，睇住其他父母抱住BB返屋企，而佢哋手上就只有一個紀念盒。
院方認失職 已達和解
涉事嘅紐卡素醫院基金信託（Newcastle upon Tyne Hospitals NHS Foundation Trust）承認違反護理責任，並承認如果白丹妮第一次入院時冇被叫返屋企，梅茜本來可以活著出世。信託已經向兩公婆支付和解賠償，金額冇公開。
代表白丹妮嘅律師阿費素（Faisal Ali）指出，妊娠毒血症如果冇適當護理係可以致命，又話事件唔係個別例子。英格蘭國民保健署（NHS England）發言人亦形容今次護理失誤「不可接受」，根本唔應該發生。
白丹妮同米安東之後再生咗個仔哈里森（Harrison），今年兩歲。白丹妮話雖然好感恩個仔嚟到身邊，但一家人始終放唔低，覺得梅茜本來應該仲喺度。兩公婆呼籲全國醫院為失去BB嘅媽媽提供另一條離院通道，唔好再有家屬要眼白白睇住其他父母抱住健健康康嘅BB返屋企。
英國產科服務屢出事
事實上，英國產科服務近年多次因安全問題成為焦點，涉及多間醫院嘅調查都指出，產婦同嬰兒因系統性問題而面對風險。今次案件中，律師強調問題「根深蒂固」，係全國性情況，唔係個別醫院出事。
至於我哋身處嘅列斯，兩間主要醫院：列斯總醫院（LGI）同聖占士大學醫院（St James’s）近年同樣經常傳出醜聞，2025 年初，醫療質素委員會（CQC）將兩間醫院嘅產科由「良好」降至「不足」（inadequate），同年6月，更被納入全國檢討。當時衞生大臣施卓添（Wes Streeting）宣布要調查全國 14 個醫院信託嘅產科同新生兒服務，列斯正正係其中之一。
