相信唔少人都有用開Vinted，將屋企啲舊嘢放上去賣錢。賣到嘅錢可以一直擺喺Vinted個戶口度，只要唔提出嚟就唔使經銀行，所以好受未成年嘅後生仔女歡迎。不過，英國政府而家諗緊將二手買賣平台都納入16歲以下社交媒體禁令。數碼、文化、媒體及體育大臣藍麗珊（Lisa Nandy）星期日證實，當局「認真考慮緊」將eBay同Vinted呢類網購平台加入禁用名單，目的係保護兒童安全。
英國本身已經計劃明年三月實施16歲以下社交媒體禁令，Instagram、TikTok同Snapchat等平台都包埋。藍麗珊接受BBC節目訪問時表示，政府正「認真考慮緊」將網購平台一齊納入。根據《星期日泰晤士報》報道，除咗eBay同Vinted，同類型嘅轉售平台Depop同Facebook Marketplace都有機會榜上有名。
另外據Metro報道，針對網購平台嘅禁令預計會透過附屬法例，喺2027年底之前生效，會比社交媒體禁令較遲推行。
擔心私訊功能俾人用嚟誘拐
政府打算擴大禁令，主要理據係擔心呢啲平台嘅訊息功能會被人誤用。有報道指，有陌生人透過私訊問兒童攞不雅相。而政府消息人士表示，有「愈嚟愈多證據」顯示16歲以下嘅青少年喺呢啲平台被人盯上。
慈善組織Children’s Society向國會提交嘅證據指出，誘拐者會研究對象嘅背景揀唔同平台落手，例如來自弱勢家庭嘅小朋友，喺Vinted被人盯上嘅機會比較大。
一項為Ofcom做嘅研究顯示，8至14歲嘅小朋友之中，有多達19%每個月最少用一次eBay，用Vinted嘅都有15%。而設有訊息功能、令陌生人可以接觸到小朋友嘅網上遊戲平台，都有可能會被限制。
平台規則形同虛設
雖然eBay喺網站寫明所有會員都要年滿18歲，因為交易涉及訂立合約。Vinted都係以18歲以上用家為對象，不過條款容許家長或者監護人幫仔女開戶口，前提係要喺家長監督下使用。但Ofcom數據顯示，呢啲年齡限制實際上好容易就俾人繞過。
近年，Vinted於英國發展得非常迅速，用戶已經有1700萬。Vinted發言人表示，私訊「係平台運作嘅一部分」，但強調對有害或者露骨內容係「零容忍」，有審查團隊同工具去清走違規活動。eBay發言人就話公司專注提供「可信賴同安全」嘅買賣體驗，會等進一步了解立法細節。
繼澳洲之後再推禁令
英國政府今年六月宣布，禁止16歲以下青少年用十大社交平台，YouTube都喺名單之內，不過專為小朋友設計嘅YouTube Kids就唔受影響。完整嘅禁用名單仲未公布，當局話會涵蓋「以促進社交互動為目的、又俾用戶發布內容」嘅平台。至於英國8至12歲小朋友最常玩嘅遊戲平台Roblox，就唔會全面禁用，但聊天等部分功能會受限制。
英國呢個禁令係跟隨澳洲於去年推出的類似措施。不過，澳洲好多小朋友已經搵到方法繞過禁令，英國就表明會用更強硬手法去處理。目前各界焦點已經轉移到禁令點樣執行，通訊監管機構Ofcom上個月已經提出咗核實用戶年齡嘅建議方案。
