以前淨係知道香港興炒玩具，想唔到原來英國都會炒公仔。英國超市 Asda 近日一款售價僅 £14 的大型毛公仔兔仔，竟然喺社交媒體掀起搶購熱潮。其實呢隻兔仔連正式嘅名都冇，Asda亦都只係好冇heart咁叫佢deer-print bunny，但因為有網民話佢「似足」名牌 Jellycat 一款要成 £70 嘅兔仔公仔，結果好多分店一上架就俾人掃清。近日更有人喺Vinted同ebay等平台放售，叫價最高去到 £60，即係原價四倍有多，但依然被掃清，結果惹來大批家長狠批。
近日，一向唔鍾意行超市嘅小朋友無端端話要去Asda，原因竟然係要去買公仔「小鹿印花兔（deer-print bunny）」。呢款公仔原本係俾人當做聖誕禮物，但連萬聖節都未到就已經被搶購一空了。呢隻大碼嘅兔仔其實好大隻，約75cm至99cm，因為有網民話佢外形同Jellycat一款售價約£70嘅兔仔好相似，但價錢就平成五分之四，於是大家就即刻衝去分店搶購。
有一位名叫Jess嘅網民話，佢喺附近Asda分店無意中發現呢隻兔仔，完全冇預過會見到，仲喺帖文度呼籲Jellycat嘅粉絲們快啲去Asda搶。另外亦有網民大讚呢隻印有「小鹿斑比」圖案嘅兔仔又軟又可愛，形容係超抵嘅發現，直言 Asda今次「做得好」。
有家長行三間分店都撲空
隨住消息喺網上瘋傳，唔少分店已經一早斷貨。有網民發帖訴苦，問有冇人見過呢隻爆紅小鹿印花兔，話想買俾個女，但炒家就搞到成件事好麻煩。
另一位家長就更加無奈，佢話自己已經行咗三間Asda都搵唔到，又負擔唔起 Vinted上面嘅價錢，所以喺網上求救，表示只要價錢比 £14 貴少少都願意俾，因為好想買嚟做女兒嘅聖誕禮物。
可以預見，隨住聖誕節臨近，呢類平價又「似名牌」嘅玩具，需求只會有增無減。
正當一般家長四處搵貨之際，有人就睇中商機，大量買入再放上網轉售。據報道，呢款兔仔已經喺Vinted上以超過原價一倍嘅價錢放售，有賣家以£35賣出，一轉手就賺咗 £21。亦有報道指，Vinted目前仲有人叫價 £50 甚至 £100，其中一個標價£50嘅話自己有四隻，系統顯示有兩隻已經出售。本報記者更發現，除咗有人以炒價放售外，甚至有人反過來出「求購」帖，表明想幫妹妹搵一隻。
炒家行為引起網民強烈不滿，有人批評「炒家搞爛晒所有嘢」。一位名叫 Charlie 嘅網民更喺社交媒體揚言，凡係喺Vinted一次過放售多過一隻小鹿兔嘅人，佢都會逐個舉報。
Jellycat 熱潮帶動「平替」需求
今次搶購潮背後，同Jellycat近年嘅爆紅有好大關係。Jellycat於1999年喺倫敦成立，而家已經將佢哋嘅高檔毛公仔賣到世界各地，每年推出數以百計新設計。品牌以布料柔軟、造型獨特見稱，標榜受時裝界啟發，吸引由細路到成年人都鍾意。
Jellycat嘅受歡迎程度，令到市場上對外觀相似、但價錢平得多嘅「平替」產品需求大增。對於唔想為一隻公仔使幾十鎊嘅家庭嚟講，Asda呢隻£14兔仔自然成為最佳選擇，而加上有社交媒體推波助瀾，終於令呢隻公仔爆紅。
至於 Asda 會唔會補貨、補幾多，目前仍未有消息。但相信連Asda自己都未必會估到呢隻公仔會咁受歡迎，恐怕聖誕之前都未必會補得切貨。所以想用原價£14買到嘅人，都真係要靠吓運氣。
