早兩日晨早去曼城送機，送完之後梗要搵吓有咩好嘢食。咁啱Stockport有間新開咗唔夠兩個月嘅港式粥店「大滿粥」，唔只有皮蛋瘦肉粥等喺香港食開嘅粥品供應，仲有油炸鬼、炸兩同炒粉麵，食完後嘅結論，完全係以前喺香港食早餐嘅情懷，真係「大滿粥」。
「大滿粥」位於曼城Stockport一個唔算中心嘅地區，好處係門口車位比較多，揸車去都幾方便。店內大約二十幾個座位，裝修簡潔，坐落都唔算逼夾。據聞喺暑假期間，呢度日日爆滿，想食要排長龍，要等個半鐘，超級誇張。不過因為我哋去嗰日已經放完暑假，而且去得早，所以仲有位。但一路食一路有客人出入，生意真係好。我諗最主要原因，係呢度真係好少有呢類港式粥店，而且出品唔錯，所以幫襯當日，發現有啲客人都好似我哋一樣，從其他城市過嚟幫襯。
據店員講，老闆Ryan曾經喺曼城開茶餐廳，後來頂咗手俾人。因為佢都喺Stockport 住，有次見到呢間鋪招租，因為門口多車位，就決定租落嚟開設呢間專做早餐嘅「大滿粥」。所以佢嘅餐牌上，除咗有粥食，仲有英式早餐提供。不過要留意佢哋營業時間只係去到下午三點，星期四五休息，晏啲去都可冇得食了。
不過我諗好多香港人，都係因為佢碗粥而嚟幫襯。我哋兩個人去到，就梗係點齊粥鋪四大天王：皮蛋瘦肉粥、咸肉糉、炸兩同炒麵。首先講吓碗粥：之前我見有人喺IG話食完佢碗粥好口乾，而且艇仔粥啲料有雪味。但老實講，我今次食完佢碗皮蛋瘦肉粥又唔覺，粥底係綿嘅，料亦足，未至去到超好食，但都叫交足功課。喺英國，可以食到港式生滾粥嘅地方真係唔多，好似我哋列斯，印象中連酒樓都冇。所以晨早流流食到啖粥落肚已經好感動。
至於隻咸肉糉，主要係夠足料。係香港一般粥舖食到嘅咸肉糉，通常都係蛋黃、綠豆同肥豬肉做餡，但呢度就有埋冬菇同一小粒元貝。撈埋甜鼓油食係幾滿足。
第三樣係炒麵。記得以前喺裕民坊街邊有個阿伯推車仔賣炒麵，啲麵好似俾油浸住咁仲賣超貴，不過，自從裕民坊拆咗，唔知點解又好想食返佢陣味，所以以前喺香港每逢去粥舖，都一定會點炒麵，然後落超勁多甜醬撈埋食。而喺「大滿粥」食到呢碟炒麵，除咗份量夠大碟之外，最緊要係唔覺得太油，碟底都冇乜油留底。老實講，炒麵要夠蔥同芽菜，啲鼓油炒得夠透，咁就唔會唔好食，咁呢度真係合格有餘。
最後不得不食就梗係油炸鬼，但因為已經食得太多，所以都係叫炸兩算啦。咁炸兩入面最緊要都係條油炸鬼，雖然俾粉皮包過後㑹淋咗啲，但依然感到係脆嘅。其實呢度仲有粢飯賣，我地買咗個外賣飯屋企食。仲記得以前一杯豆漿一舊粢飯做早餐嘅日子，真係滿滿嘅情懷。
記得以前屋幫樓下間粥鋪好細間，廚房煮粥蒸腸粉嘅水蒸氣會不知不覺地飄滿整間鋪，天寒地凍行入去食返碗熱粥可以話係一大享受。而「大滿粥」因為個廚房喺下半層，間鋪又比香港嘅大，雖然我見阿姐姐好勤力咁盡快將啲嘢送到客人枱面，但食落感覺好快凍，變得冇咁好食了。
低調採訪當日（我哋去探訪事前唔㑹通知對方），咁啱撞正嗰對飲食Youtuber夫妻嚟到拍片，可見佢哋人氣真係滿分。係囉，粥鋪喎，淨係睇個餐牌，香港人已經充滿睱想，點㑹唔嚟試？美中不足係有網民話佢哋價錢唔親民，但我覺得就係一般酒樓價平少少囉，當然唔可以同香港比較了。
| 大滿粥Joyful House |
| 地址： 15 Kingsleigh Rd, Stockport SK4 3QF |
| 營業時間： |
| 星期六至三：0930-1500 |
| 星期四、五：休息 |
| FB ：https://www.facebook.com/p/%E5%A4%A7%E6%BB%BF%E7%B2%A5Joyful-House-61592115530881/ |
