英國街頭最熟口熟面嘅「一鎊店」Poundland經常傳出財困，繼上年舊老闆以象徵式價錢£1將集團售予美國投資公司Gordon Brothers後，只短短一年又再傳來賣盤消息。不過今次Gordon Brothers唔打算成盤生意賣，仲拒絕咗來自愛爾蘭嘅收購建議，令呢間有36年歷史嘅零售連鎖集團可能要進入破產程序，甚至搞到連首相貝安德都要出聲，問因咩事要搞成咁？
今次事件最令人嘩然嘅，係原本有人肯成間公司接手。據報，美國投資公司Gordon Brothers作為Poundland老闆，拒絕咗愛爾蘭地產商Martin Property Group嘅收購建議，而Poundland管理層本月早前已經揀咗對方做首選買家。
至於點解唔賣，《每日電訊報》報道指，Martin Property Group唔肯答應Gordon Brothers要求即時全數還清一筆三千萬鎊嘅股東貸款，所以交易告吹；而呢筆貸款係Gordon Brothers當初收購時以一英鎊連同公司一齊接手。另外，《衞報》報道，Gordon Brothers認為將公司拆散分開賣，可以收到比Martin出價更多嘅錢。而事實上，據Retail Week報道，B&M同Lidl都加入咗爭奪戰，連The Range母公司CDS亦都曾經出價，但都被Gordon Brothers拒絕。
Poundland董事總經理威廉斯（Barry Williams）向員工發信，形容老闆收緊日常營運資金嘅做法係「意料之外、冇人想咁、而且完全可以避免」，又對對方拒絕一個「資金充足、隨時可以落實、可以保持業務完整」嘅收購建議表示失望。連董事局都有人頂唔順，天空新聞報道，本月先至請返嚟、負責帶領出售程序嘅三名獨立董事，預料會因為同Gordon Brothers意見不合而辭職，消息指佢哋不滿東主似乎想將公司推向破產程序。
首相親自出聲
今次事件，甚至驚動到首相貝安德出聲，問點解Gordon Brothers拒絕收購建議。佢表示：「點解Poundland東主明明有可信嘅買家肯接手成盤生意，都要冒住幾千人失業、大街再多啲吉舖嘅風險？」佢又表示政府「準備好支援」受影響員工。
不過佢咁緊張，其實都係出於私心。因為Poundland最大嘅配送中心就喺貝安德自己嘅Makerfield選區，而公司提交接管通知，正正係財相賀理安（John Healey）發表首份財政預算案之後24個鐘。另外，已經有Poundland員工喺西米德蘭茲郡Walsall嘅客戶支援中心外面抗議。
一年前「一蚊店賣一蚊」 十年前值六億
其實Poundland可以話係英國零售界嘅神話，創辦人Steve Smith由Bilston街市擺檔起家。公司喺1990年4月成立時，起始資本只有五萬鎊；第一間試業店喺同年12月於Burton upon Trent開張，第一日已經做到一萬三千鎊生意。到1996年，佢哋仲試過喺香港開設辦事處，負責採購同支援英國業務。直至2016年，公司發展可謂如日方中，並以6.1億英鎊出售予南非集團Steinhoff。不過英國近十年遇到嘅問題相信大家都知，結果到2025年6月，Gordon Brothers只用象徵式一英鎊就買下成間公司。名副其實「一蚊店賣一蚊」。
Gordon Brothers接手之後即刻大執，關閉兩個倉庫同68間表現最差嘅分店，影響超過二千個職位。到今年，8月傳出Gordon Brothers同顧問商討拍賣公司，結果演變成今日局面。
依家距離聖誕只係幾個星期，十日保護期內會唔會有買家接手，仍然係未知之數。不過有報道指出，就算達成交易，都好大機會唔會包晒所有分店，部分職位相信難以保住。對一眾員工同依賴Poundland買平價日用品嘅街坊嚟講，呢個冬天都真係唔容易過。
