今屆世界盃正踢得如火如荼，因為喺英國時間黃昏至夜晚踢，以前喺香港一面食飯落吧睇波嘅回憶返晒嚟。不過，對於喺英國做零售飲食嘅朋友，呢個六月都真係唔係幾易過，事關大家都寧願安坐家中睇波了。咁既然大家都唔得閒煮飯，不如考慮吓叫外賣，支持吓啲香港人小店？就好似今次要介紹喺列斯大學區附近嘅韓式炸雞店Chimaek Oppa，簡單一句就係抵食夾好食，一面食住炸雞一面支持英格蘭，絕對係賞心樂事。
今次介紹嘅Chimaek Opp其實係喺前年十月開張，老闆Jacky喺香港做開飲食、開過糖水店。佢份人好好傾（拍得住Kirkgate Market 林家謙，如果你知係邊個的話），所以你會發現有唔少香港人專程嚟幫襯。佢話，嚟到列斯之後，就開始喺大學區附近物色地方開舖。因為目標顧客主要係大學生，所以佢就諗住賣啲比較國際化嘅嘢食，因為K-Pop流行，就決定賣韓式炸雞。
咁究竟生意好唔好呢，Jacky第一句就話好難做，特別係啱啱開鋪嗰段日子，生意好唔穩定，幾乎做到懷疑人生。舉一個例子，因為喺大學區，外國顧客同香港人顧客嘅比例係9比1，咁好多外國學生，對雞肉嘅偏好同我哋好唔同。佢哋偏好係要好熟，有少少粉紅色都會話唔熟。相反我哋會覺得如果雞肉太熟會冇晒肉汁，覺得鞋，試過有啲客人真係會投訴話唔熟，搞到好麻煩。
幸好，經過呢年幾時間嘅摸索，佢哋開始會因應客人嘅需要而作出調校。例如知道係本地客人，佢哋會check過每一件雞嘅溫度夠晒高先出品。直到今年，生意慢慢上軌道，例如知道原來五月會生意比較好，因為啲學生要考試，就會叫外賣等等。
其實，我哋都幾乎訪問過晒喺列斯香港人開嘅食店，基本上每一位都講過類似嘅故事。喺列斯做食，遠遠比想像中困難。有時真係唔係啲嘢好食就會好生意，仲要考慮成本、顧客、食材之類好多唔同嘅因素。所以，我覺得我哋好應該支持吓呢班有堅持嘅朋友。
當然，作為食店，值唔值得支持，最緊要都係啲出品究竟好唔好食：首先，Jacky係個非常細心嘅老闆，我同佢講話想食bibimbap（韓式拌飯），但因為有小朋友所以驚辣，佢就特登俾咗兩種拌飯醬，一款係佢哋自己整嘅韓式辣醬，另一款係甜鼓油，所以值得加分。
至於招牌菜韓式炸雞，佢哋嘅炸漿係比較厚但炸得鬆脆，咁樣可以包住舊雞，令肉汁冇咁易流失。另一個賣點係佢哋有好多口味，咁我哋就點咗招牌醬油、蜂蜜牛油以及紫菜味。
同行之中有個少女平時唔多鍾意食肉，但佢都話蜂蜜牛油味好食，一個人掃咗三件。我就覺得紫菜味夠足料。紫菜粉超多，包到成舊雞變咗綠色，如果你同我一樣好鍾意食紫菜，咁一定超滿足。
咁我點解話用佢啲雞嚟送世界盃正呢？原因之一係佢哋價錢一啲都唔貴，叫餐十二舊雞加兩客薯條同嘢飲都係£17.6，我哋三大兩細去食，三十鎊就食飽了。美中不足只係堂食冇酒賣，所以叫外賣或者買返屋企食用嚟送啤酒真係好正。
其實呢間鋪我去過兩次。第一次去，人多到排晒大隊，所以買完就走。到今次，我聽其他餐廳講話唔見晒啲客，所以專登又去再幫襯。畢竟晚飯時段踢世界盃，除咗酒吧生意做唔停外，其他食肆真係好大影響，當年喺香港小弟都見識過。
嚟到一個陌生環境，要重新開始並唔容易，有呢番勇氣，我哋當然要多多支持。其實唔止Chimaek Oppa，其他香港人店都係好值得我哋去幫襯，同聲同氣仲有熟悉嘅味道，呢份親切感係冇嘢比得上。
| Chimaek Oppa |
| 地址： 66 Brudenell Rd, Leeds LS6 1EG |
| 營業時間： |
| 星期三至日：15:00 – 23:00 |
| 星期一及二休息：15:00 – 23:00 |
| IG：https://www.instagram.com/chimaekoppa/ |
