以前喺香港食粉麵，好多時都會食牛雜，貪佢口感夠豐富，但嚟到列斯真係冇乜機會食。有次收到風話Sheffield有間茶仔有得食牛雜河，即刻飛車落去，點知完全唔係嗰回事！後來上年喺Coin Exchange個年宵，竟然發現有真正嘅牛雜食，簡直驚為天人。可惜嘅只係得市集有得食，平時想食都難。不過，今個月喺Kirkgate Market新開嘅「李氏力場」終於有牛雜食啦。食完感覺係佢哋好注重細節，連必備嘅辣椒油都係佢哋自己炒。加埋海南雞飯、鐵板餐及焗豬扒飯等港人最愛，點都要去試一試。
筆者其實好早就已經收到風，話有一位喺香港好有經驗嘅廚師會落戶列斯，將會喺Kirkgate開檔。結果等到暑假都過埋，佢地終於開業，叫「李氏力場」。據老闆Kitson講，因為佢自己姓李，但如果改名做「李記」之類又好似太娘，所以改咗個香港人一定有共鳴嘅名。佢其實喺香港做咗三十年廚，之前做過好多間酒店同食肆，仲自己開過茶餐廳。所以無論係中西式，以至甜品都好有經驗。至於佢決定做返港式嘢，佢話最主要係希望可以將港人熟悉嘅味道，帶俾身處列斯嘅香港人，以及推廣俾本地嘅顧客。
雖然開業唔係好耐，佢哋已經有班本地嘅客人定時會幫襯，原因係佢哋嘅鐵板餐所用嘅黑椒汁係佢自己調校，同本地餐廳食到嘅唔同。咁筆者試過後，覺得佢哋嘅出品又真係好細心，好多細微位都冇hea做。例如佢哋用嘅辣椒油係自己炒，海南雞飯啲薑蓉又係自己磨，連2.5一杯嘅豆漿，都係真係佢哋磨豆自己煲。我聽聞有啲英國食肆，竟然會用本地制嘅現成豆奶倒落隻杯就咁賣俾你。由此可見，作為一名專業廚師，佢的確好用心整好自己嘅出品。
至於喺英國做食同香港最大嘅分別，Kitson話主要係食材同供應商好唔同。眾所周知，香港啲茶餐廳嘅奶茶咖啡，基本上一間捷榮就訂得晒，但嚟到英國，佢哋就真係要自己四圍搵齊粗茶、幼茶等唔同嘅茶葉，溝完一輪，先至可以沖到一杯港式奶茶出嚟。
又例如佢哋主打嘅牛雜河，不外是腸、肚、肺、膀，就咁睇好似好簡單，但原來係來自唔同供應商，好似佢哋用嘅牛肚來自英國，但牛膀竟然係由法國入口。加上喺列斯嘅中式供應商唔多，有時要去到曼城攞貨。咁複雜，難怪喺英國，想食一碗牛雜都咁難了。
至於佢哋另一個主打菜色就係海南雞飯配椰子雞湯。記得以前喺香港，因為唔想食澱粉質，有時會食半隻海南雞當一餐。嚟到英國，好食嘅海南雞絕少，我覺得最大原因係英國嘅雞唔好食。喺香港食到嘅雞，皮厚多脂肪，連雞胸肉的唔會太鞋；但喺到英國，雞種唔同咗，皮太薄又冇乜雞味，如果用喺香港同一種方法去整海南雞，可以話一定唔好食。而我喺呢度食嘅呢碟海南雞係滑嘅，我諗好大原因係老闆做過西廚，知道要點整呢啲本地雞，所以先可以盡量還原到我哋以前食開嘅味道。
所以，雖然餐牌上嘅選擇唔多，但係Kitson話，佢每一樣出品都試過上百次，先可以調校出適合本地食材嘅配方。而我認為「李氏力場」值得推薦嘅原因，就係老闆用心製作嘅呢份毅力。
除咗牛雜及海南雞外，另一款主打菜式係鐵板雞扒餐，即係喺香港食慣嗰隻燒紅塊鐵板然係淋上醬汁嗰種；另外最新推出有焗豬扒飯，下次有機會一定會試。Kitson仲話，嚟緊會推出更多時令食品，好似羊腩煲、盆菜、蘿蔔糕及賀年食品等，如果大家有興趣，可以留意吓佢哋嘅Facebook 專頁。
| 李氏力場 |
| 地址：Kirkgate Market Unit 245 , LS2 7HY |
| 營業時間：星期一至六 10AM – 5PM |
| FB：https://www.facebook.com/p/%E6%9D%8E%E6%B0%8F%E5%8A%9B%E5%A0%B4-61573365133874/ |
