相信唔少喺香港做過廚嘅朋友，嚟到英國之後都會諗吓做返老本行。誠言廚師呢個行業，即使去到全世界都好吃香，喺英國，亦有唔少朋友做到門庭若市，誇張者如曼城鬼廚入面嘅忠輝燒臘，真係未開檔已有人排隊一直排到收檔。但現實係，亦有唔少朋友仍然艱苦經營，就好似今次介紹呢間喺Sheffield嘅魂飯堡（Soulyaki Rice Burger），我哋四個人去，四個都讚佢個飯堡好食，但老闆就大嘆話生意難做，顯得一臉心灰意冷，咁究竟係咩原因呢？
有次教會朋友講起，話Sheffield個The Moor Market啲海鮮好抵買，於是有時間就去行吓，順便搵吓附近有咩好食。平時我哋多數去盈茶餐廳食炒河炒麵，但朋友話魂飯堡都唔錯，咁梗係要試吓。
首先講食物質素，呢度叫得做魂飯堡，招牌菜梗係日式飯漢堡。簡單咁講，就係用一大塊紫菜，中間夾一層飯同埋醬汁，餡就係主菜例如炸雞炸蝦，甚至三文魚刺身。醬汁就有得俾你㨂，去襯返主菜，例如生薑燒配原味甜鼓油、炸軟殼蟹就配wasabi醬等等。我哋四個人叫咗四份，結論係呢度啲炸物好得，新鮮炸出嚟酥脆可口，夾埋個汁同個紫菜飯一齊，的確係好食，忍唔住幾啖就食完了。
另外我哋叫咗可樂餅同韓式炸雞，都係脆口嘢，結論相同，都係炸得好食。
食到咁上下，老闆阿朗走出嚟同我哋傾咗幾句。咁我哋當然讚吓佢啲嘢好食，不過，佢話：「啲嘢好食係唔夠嘅。」言談之間，竟有點意興闌珊。
大學排名下跌成死症
老實講，呢間餐廳位於市中心，但行到入去，如果呢度只係開咗一年的話，感覺唔算光鮮。我相信係因為生意唔夠，餐廳上下都係阿朗一個人打理，仲要一星期開足六日一日十個鐘，就幾可肯定佢要顧掂啲出品已經唔容易。明明啲嘢好食，但點解生意唔好？我相信同謝菲爾德大學（University of Sheffield）嘅內地學生近兩年大減不無關係。
事實上，之前已經有朋友講過，雖然謝菲爾德大學作為羅素集團成員之一，但自從於2023年尾公布嘅QS 世界大學排名（即係QS2024版本）跌出世界排名100名以外後，2024年海外學生的新生數量便大減了近26%。其中一個原因，係當年中國政府鼓勵學生出國留學，會以「世界百強大學」為標準，當謝菲爾德大學跌出一百名的紅線外，受到的衝擊便大了。及至近兩年，謝菲爾德大學的排名雖然已回到百大以內（QS2027更排名82位，跟列斯大學差不多），但又輪到中國經濟差，內地大學生畢業都只能去送外賣，一唔係就躺平，出國讀書的動力便自然少了。
海外學生人數跌，加上英國經濟差，Sheffield本身又唔算係富裕城市，直接導至該市的消費力大減，而明顯主力做學生生意嘅魂飯堡就肯定首當其衝。記得上年有次平日行過市中心條high street，竟然八點左右好多鋪頭都已經收鋪，就知影響有幾嚴重。
再者，如果係做學生生意，即係每年大學放暑假，啲學生就返晒家鄉。我見佢哋今年八月都試過休店成個月。一年實際只係做到八個月生意，其餘四個月隨時連租都蝕埋，咁又點做到落去？
另一個問題，就如阿朗所講，啲嘢好食，好多時要取捨。如上文所講，佢哋啲炸物好食，就表示一定要現炸現食，如果變做外賣，啲嘢攤凍咗就差好遠了。
所以，阿朗說呢句：「啲嘢好食係唔夠嘅。」唔難理解。
咁我問佢之後有咩打算，佢話因為簽咗租約，都會繼續做落去，之後再作打算，或者會搬去其他城市，但未必會再開餐廳了，因為已經俾今次經驗嚇怕咗。
我覺得，佢依家只係唔小心跌咗入個坑，以後必定會有後路，因為佢擁有一個廚師最重要嘅元素，就係整嘢真係有堅持而且好食。依家佢遇到嘅只係marketing上嘅問題，以後總能夠解決。
最後，呼籲吓大家，其實由列斯揸車去Sheffield都只係一個鐘左右，唔算遠，Sheffield唔只有The Moor Market，仲有泊車好方便嘅大型商場Meadowhall，大家下次去玩，不妨去魂飯堡幫阿朗打吓氣。
| 魂飯堡（Soulyaki Rice Burger） |
| 地址：142 Devonshire St, Sheffield City Centre, Sheffield S3 7SF |
| 營業時間： |
| 星期一至五：11 am–8:30 pm |
| 星期一至六：11 am–9:00 pm（星期日休息） |
| FB：https://www.facebook.com/profile.php?id=61581987058140 |
