英國財相賀理安（John Healey）周三（10月28日）喺國會發表任內首份財政預算案，推出多項針對生活開支嘅措施，包括冬季 £100 能源補貼、取消煤氣「固定收費」、撤回削減現金 ISA 上限，以及最低工資上調 3.9%。不過，個人入息稅門檻繼續凍結，打工仔整體稅負未見減輕。《種子新聞》今次就幫大家歸納各位市民關心嘅重點。
A至D級屋可獲£100能源補貼
今次預算案最直接嘅「派錢」措施，係向英格蘭最多 2,000 萬個家庭發放 £100 能源費用補貼。不過並非人人有份，只有居於市政稅（Council Tax）A 至 D 級物業嘅家庭先合資格，而措施只適用於英格蘭。
至於幾時發放，MoneyWeek報道指會喺今個冬天派發，但MoneySavingExpert 就將措施列入 2027 年起實施嘅項目，具體時間及安排仍有待政府公布。居於列斯嘅讀者，可以喺 GOV.UK嘅Council Tax查詢頁面輸入郵區編號，查清楚自己屋企屬於邊個級別。
煤氣「固定收費」將成歷史
另一項較受關注嘅措施，係取消煤氣帳單上一直以來萬惡嘅Standing Charge。所謂Standing Charge，即係無論用幾多都要每日向供應商繳付嘅接駁費用。政府表示，全英約2,300萬戶嘅煤氣帳單將取消呢項收費，最快2027年實施。
理財專家劉易斯（Martin Lewis）及其網站多年來一直爭取取消固定收費，認為收費對低收入及想慳住用嘅家庭不公平。取消之後，相關成本會轉移到每度用量嘅單價上，換言之用得少就慳得多；但用量較大嘅家庭，帳單未必會因此減少。
現金ISA上限維持£20,000
前財相李韻晴（Rachel Reeves）去年宣布，由 2027年4月起，65歲以下人士每年嘅現金ISA供款上限將由£20,000大減至 £12,000。之前我哋都評論過，現金係投資之中不可或缺嘅部分，只有唔識經濟嘅人先會諗住cut現金ISA上限，幸好賀理安今次終於決定撤回有關削減，現金 ISA上限維持£20,000不變。呢個係預算案入面較為明智嘅決定，亦避免咗ISA規則明年因新上限而變得更複雜。
燃油稅再凍結 公幹里數補貼上調
揸車人士方面，燃油稅繼續凍結，入油成本暫時唔會因稅項上升。
經常要用自己架車或客貨車返工、出外勤嘅打工仔亦有著數。由 2027 年 4 月起，僱主可以免稅發還嘅「里數補貼」（mileage rate）會作調整：首 10,000 英里維持每英里 55 便士，超過 10,000 英里嘅部分則由每英里 25 便士加至 35 便士。換言之，每年公幹里數愈多，受惠愈大。
最低工資加 3.9% 福利同步上調
基層打工仔方面，國民最低工資（National Minimum Wage）及國民生活工資（National Living Wage）將上調 3.9%，約 230 萬名僱員受惠。領取統一福利津貼（Universal Credit）人士，津貼將上調 4.3%；低收入嘅國家退休金領取人士亦會獲得減稅。
預算案另有多項針對特定群組嘅措施：
- 自僱新手爸媽：約 15 萬名目前未能領取法定侍產津貼嘅自僱人士伴侶，將來可獲兩星期、每週最多約 £194 嘅津貼，細節仍待財政部公布。
- 照顧者：照顧者津貼（Carer’s Allowance）收入稍為超標就全數取消嘅「懸崖效應」，將於 2030/31 財政年度起取消。
- 環保家居：政府將提供免息或低息貸款，資助家庭安裝太陽能板、儲電池及熱泵等設備。
- 首置人士：英格蘭將推出全新「Your First Home」按揭計劃。
稅階繼續凍結 打工仔稅負未減
不過，今次預算案對一般中產打工仔嚟講，未算有大著數。個人免稅額同入息稅門檻繼續凍結，即免稅額維持 £12,570、基本稅率上限維持 £50,270，凍結期早前已延長至 2030/31 年度。由於門檻唔跟通脹調整，人工一加，交嘅稅都會跟住增加，即所謂「財政拖累」（fiscal drag）。
此外，Plan 2 學生貸款還款門檻凍結照舊推行，而私人退休金由 2027 年 4 月起仍會計入遺產稅。
整體而言，今次預算案以「小修小補」為主，£100 補貼、取消固定收費等措施對基層及一般家庭有一定幫助，但打工仔稅負並未因此減輕。部分措施嘅申請方法及實施日期仍有待政府公布。
