除咗香港人開嘅餐廳之外，由香港人搞嘅市集，應該係我哋最容易搵到親切感嘅地方。事實上，依家英國各大城市都會有唔同團體，定期舉辦唔同主題嘅市集。不過，類似嘅市集，除咗農曆新年嗰一窩蜂外，喺列斯並唔多。幸好近來收到消息，喺下月初，列斯Corn Exchange會有一個香港人搞，以東亞夏日祭典為主題嘅「Wishes & Stars」市集。所以，今次我哋專登訪問咗主辦商阿Jane，同我哋介紹吓呢個市集嘅獨特之處。
記得今年農曆新年，列斯Corn Exchange有個香港人搞嘅新年市集。除咗有港式小食外，仲有唔少手工藝品。因為Corn Exchange本身有唔少本地人顧客，所以新年市集當日，除咗香港人之外，本地人亦唔少，估計各佔一半。
呢個市集之所以能夠吸引本地顧客，主要係同個市集嘅取向有關。依家好多市集，主要係以香港情懷為賣點，但呢個市集就多咗份文化氣息。就好似市集嘅搞手阿Jane所講，相比起單純做一個香港人市集，佢更希望透過活動將東亞（日韓台）文化帶到英國。近年日本動漫文化、K-pop 等韓國流行文化喺英國一直相當受歡迎，所以希望透過市集、工作坊同文化活動，將香港、日本、台灣、韓國等不同東亞文化元素結合起來，吸引本地人參與同認識我哋嘅文化，而唔只係服務華人社群。
所以，佢喺下月舉行嘅「Wishes & Stars」市集，就係以東亞夏日祭典為賣點，而星期五（三號）嘅夜晚市集，更會以「台灣夜市」為主題，據佢講，當晚除咗有亞洲熟食之外，仲有台式攤位遊戲，希望可以營造當年喺台灣士林夜市嗰種氣氛。
眾所周知，Corn Exchange本身係賣精品同手工藝品嘅市場，所以佢哋嘅參展商，唔少都係賣手工藝品。因為呢個場本身就係for呢類客，據佢所知，呢類攤檔嘅生意都唔錯，所以唔少檔主都會keep住參加喺呢度搞嘅市集。
「Wishes & Stars」市集
今次市集會喺七月三號至五號於Corn Exchange舉行。如上文所講，七月三日（星期五）係夜市，時間係5:00pm至9:00pm。因為喺列斯，另一個熱門場地Kirkgate Market會受營業時間影響，通常市集下午五、六點鐘就收。而阿Jane話，佢哋之前試過喺Corn Exchange搞同類型嘅夜市，氣氛唔錯，所以反應都幾好。
之後七月四日及五日，就主要係文化市集。除咗熟食及包裝食品外，主打嘅係精品及手工藝品。因為星期六Corn Exchange本身就好多人，加上根據過往經驗，預計反應理想，所以所有攤位都一早俾人Book晒了。至於星期日，因為Kirkgate Market唔開，好多市集都唔會喺星期日搞，所以預計會吸引唔少鍾意星期日行街嘅顧客。
如果有留意我哋「種子新聞」，應該會發現我哋介紹過好多香港人喺列斯開嘅餐廳。好大原因，係我哋覺得，如果可以喺呢度搵到啲我哋熟悉嘅味道，會令大家更容易對呢個地方有歸屬感。其實除咗餐廳之外，港人市集亦係另一個重要場合，就好似每逢農曆新年喺全國各地舉行嘅新年市集，總係人山人海。大家趁呢啲機會聚吓，凑吓熱鬧，嗰份共鳴感有時更加難得。
其實喺英國各大城市，好似倫敦、曼城、Warrington、伯明翰同諾定咸等，已經有唔少港人市集不定期舉行。希望以後喺列斯都會越嚟越多，令我哋列斯人可以搵到更多親切感。
順帶一提，我哋預備咗一份點樣成為檔主嘅攻略，下次再同大家分享。
| 「Wishes & Stars」市集 |
| 地點：Leeds Corn Exchange, Call Ln, Leeds LS1 7BR（泊車最方便係泊NCP Leeds The Markets） 日期： |
| 七月三日（星期五）5:00pm至9:00pm |
| 七月四日（星期六）11:00am至6:00pm |
| 七月五日（星期日）10:30am至3:30pm |
| 入場費：全免 |
