有日朋友同我講，話伯明翰有間香港人開嘅餐廳竟然有煎蠔餅同蠔仔粥食，仲要係香港人開。老實，我淨係知道伯明翰有檔嘢賣潮式鵝片幾好食，原來依家仲有潮式蠔仔粥，咁就真係非常吸引。始終以前喺香港，間唔中都會去打冷，但因為潮洲菜好講究食材，喺英國好難搵到。於是我哋就趁住假期，專登南下伯明翰去試呢間只係開咗半年嘅「琦興大排檔」。先講結論，蠔仔粥係好食嘅。
今次介紹呢間琦興大排檔，我諗應該所有伯明翰嘅香港人都幫襯過。據說老闆昌哥，喺深水埗通州街開咗「琦興餐廳」超過30年，高峰期仲有三間鋪，係好多深水埗街坊嘅飯堂。因為佢曾經喺英國留學，早幾年佢就返嚟英國，喺伯明翰嘅亞洲food court「漢朝美食廣場」開咗「琦興餐廳」。直至半年前，佢就喺美食廣場同一層嘅一個獨立鋪位，再開咗呢間「琦興大排檔」。
顧名思義，新開嘅琦興大排檔主打港式小菜，例如招牌西檸雞、咕嚕肉同炒粉麵飯等等。最驚喜嘅係冷盤當中，有海蜇燻蹄，咁當然要試吓。
今次嚟到，的確係因為想食蠔餅同蠔仔粥。首先要評定一碟炸蠔餅好唔好食，不外乎：「外脆內嫩、蠔鮮蛋香」。當然唔可以成碟油，先算合格。
先講大家最關心嘅「蠔仔」：因為一般喺香港食到嘅炸蠔餅，主要係用細珍珠蠔做主要材料，呢種蠔係廣東沿海嘅土產，喺英國應該唔容易食到。咁呢度用嘅「蠔仔」，其實比珍珠蠔大隻，口感的確有啲分別，不過用咗正宗大牌檔嘅方式去處理，粉漿有蛋香又炸到酥脆，一大底咁上桌，再點埋魚露食，總算可以一解相思之苦。美中不足係唔見有啤酒賣，始終一面用碗飲啤酒，一面食炸蠔餅，應該係唔少香港人嘅回憶。
因為同行之中，有人怕油炸食品，所以點埋方魚肉碎蠔仔粥。傳統潮式蠔仔粥用大地魚做湯底，飯要粒粒分明唔可以太爛，最重要嘅蠔仔要夠完整，咬落去有汁爆開。所以我覺得，用呢種比較大嘅蠔去做材料，又的確幾夾，連一向唔食粥嘅我都掃咗幾碗。
至於其他小菜，都有一定水準，好似傳說係「廚房兩大尅星」嘅咕嚕肉同乾炒牛河，咕嚕肉唔會炸到太乾，甜酸味亦適中。至於乾炒牛河，應該係略帶焦香，咁呢度總算合格。
其實呢度有餐叫，一個頭盤（海蜇燻蹄/醉雞），一個煲仔菜一個小菜，再加埋飯同飲品都只係£44，計落唔算貴，再加埋個炸蠔餅，三個人食都夠。
我有個朋友喺Solihull定居，有次同佢食飯，就係喺呢個漢朝美食廣場。除咗食咗碟琦興嘅乾炒牛河外，仲食咗另一檔嘅鵝片，印象中都幾好食。以前喺香港成日走去打冷，有時食嘅唔係食物本身，而係同朋友飲酒暢聚嗰種情懷。我諗嚟到英國定居嘅朋友，總會有時覺得孤獨，咁我覺得搵朋友去食番餐我哋食慣嘅嘢，傾吓偈，應該係唔錯嘅思鄉病良方。
| 琦興大排檔 |
| 地址：Unit2, 1st Floor, Han Dynasty food court, 143 Bromsgrove St, Birmingham B5 6RG（即漢朝美食廣場一樓） |
| 營業時間： |
| 星期一至五：11:00 – 22:00 |
| 星期六、日 : 10::00 – 23:00 |
| FB： https://www.facebook.com/p/琦興餐廳-100057304425854/ |
