
相信今朝列斯嘅街坊一起身都會感到凍咗好多,原因係一股由北極吹嚟嘅凍空氣周日晚橫掃英國北部,氣溫一夜之間跌穿冰點。英國氣象廳(Met Office)先後發出結冰同降雪黃色警告,而列斯所在嘅約克郡及亨伯(Yorkshire and the Humber)正正被英國衛生安全局(UKHSA)列入低溫健康警示範圍。氣象廳預計周二清晨起,由西米德蘭到蘇格蘭南部一帶都會落雪,高地積雪最多可達15厘米。聽朝返工返學嘅朋友,記得預多啲時間。
根據氣象廳資料,結冰黃色警告由周日晚6時生效,到今日(周一)上午10時結束,覆蓋蘇格蘭北部及東部,以及英格蘭北部嘅坎布里亞(Cumbria)、諾森伯蘭(Northumberland)同達勒姆(Durham)部分地區。周日先落過雨,入夜氣溫再急跌,所以雨水、雨夾雪,或者山區落嘅雪,一落到零度以下嘅地面就會結冰。未灑鹽嘅馬路、行人路同單車徑最危險。

不過真正要留意嘅係聽日(周二)。降雪黃色警告由周二凌晨零時生效至中午12時,範圍由西米德蘭(West Midlands)一直伸延到蘇格蘭南部,包括英格蘭東北、西北,以及約克郡及亨伯。
氣象廳估計,大部分地方積雪約1至5厘米,但海拔300至400米以上嘅地方可以積到5至15厘米。好消息係,受影響嘅主要係海拔100米或以上嘅地區;低過呢個高度嘅地方,雪通常落完好快就溶。不過列斯唔少地方地勢唔低,例如列斯布拉德福機場一帶,以及往約克郡谷地(Yorkshire Dales)方向,住喺高處嘅朋友要特別小心。
氣象廳提醒,部分道路同鐵路可能受影響,揸車、搭巴士同火車都會慢咗,亦唔排除會停電。
健康警示:重點照顧長者
衛生安全局同時就英格蘭西北部、東北部同約克郡及亨伯發出黃色低溫健康警示,由周日晚9時起生效,到周四(19日)上午9時結束。呢類警示只會喺英格蘭發出,主要畀醫療同社福界預早準備。黃色即係寒冷天氣對醫療服務有「輕微」影響,但體弱人士嘅風險會增加。其實衛生安全局本月12日已經就西北部同西米德蘭發出今個冬天第一個低溫健康警示,估唔到咁快又嚟第二輪。
衛生安全局公共衛生顧問科爾曼(Paul Coleman)表示,今次只係今季最新一個警示,越入冬預計會越多。佢指寒冷天氣對65歲或以上人士同有長期病嘅人影響特別大,呼籲大家關心身邊最脆弱嘅親友同鄰居。佢建議盡量令最常用嘅房間保持溫暖,同埋着夠衫。

出門前做足功課
對港人嚟講,落雪聽落好浪漫,但雪停之後結冰先至最麻煩。以下幾點可以參考:
揸車:出門前預定時間刮走擋風玻璃上面嘅霜,千祈唔好淋熱水,否則玻璃可能會爆。如果你部車有除霜功能,就最好預早開定先。另車上最好放張氈、電筒同電話充電器,以防塞車或者壞車。
睇灑鹽路線:列斯市議會負責主要道路嘅灑鹽工作,但唔係每條街都會處理。市議會網站有灑鹽路線圖同即時追蹤器,住喺小路或者斜路嘅朋友出門前可以上網睇吓。網址係:
https://www.leeds.gov.uk/parking-roads-and-travel/ice-and-snow-clearing
搭車返學:周二出門前,先上 National Rail 或者巴士公司網站查吓有冇延誤。如果遇上大雪,學校可能臨時停課,記得留意學校嘅短訊或者電郵。
行路:行人路結冰好易跣親,揀鞋底有坑紋嘅鞋,筆者初嚟英國時唔知死就咁著對波鞋真係跣親,好彩冇斷骨。
寒冷天氣補助
另外,政府嘅「寒冷天氣補助」(Cold Weather Payment)今季由2026年11月1日運作至2027年3月31日。如果你住嘅地區連續七日平均氣溫喺零度或以下,領取指定入息審查福利嘅家庭每次可以自動收到25英鎊,唔使申請,一般喺寒冷期完結後14個工作天內入數。大家可以喺 GOV.UK 輸入郵區編號,睇吓自己住嘅地區中唔中。
不過要留意,雖然有部分居英港人已經申請咗入籍,理論上可以獲得,但「寒冷天氣補助」並唔係獨立申請,而係經指定福利例如攞緊Pension Credit或Universal Credit嘅家庭發放。實際上要攞呢25英鎊並唔容易,詳程可以到以下網站查詢:








