香港人移民嚟英國，通常首選都係幾個地方：倫敦及周邊、曼城、Warrington，又或者伯明翰、Bristol、Nottingham。為咗讀書就牛津、劍橋、雷丁。即係話數嚟數去都未到列斯。咁可能你會問，列斯有咩好？我作為一個列斯人，簡單答你就係呢度冇咁混亂。
記得有次同朋友講我搬咗去列斯，住曼城既佢好大反應：「吓，做乜搬到咁入？！」咁係唔係真係好入就見人見智，但我相信，其實列斯呢個城巿對一般香港人嚟講的確比較陌生。
其實，根據GDP又好，人口又好，一般本地人都會認為列斯係英國第四大城巿（頭三位係倫敦、曼城同伯明翰）。呢個城巿係除咗倫敦外第二大商業中心，金融及專業服務行業比較多。雖然都有工廠，但比例上冇其他城巿咁多。列斯人因為收入比較高，所以巿中心都叫做似返個大城巿，基本上生活配套，行街食飯睇戲落Pub，都可以好容易搵到。
咁如果你打算搬嚟列斯，我諗都係離不開幾個考慮因數。
第一個係住：一般嚟講，列斯巿中心北面地區比南面好（但有例外），傳統好區例如Horsforth、Meanwood、Chapel Allerton、Roundhay、Moortown同Alwoodly等等，都係喺巿中心北面。但近年有啲香港朋友選擇搬去西南部既Morley。雖然聽啲本地人講，以前呢個地方唔算好好，不過近年已經大為改善，成為列斯其中一個熱門地方。因為Morley自成一角，有自己個Town仔，同埋嗰度有間好學校The Morley Academy，人口感覺冇咁混雜。加上兩年前Morley屋價唔算太高，所以好多人選擇呢度做落腳點。但隨住越來越多人搬入去，嗰度啲屋價已經高咗好多了。
至於上面所講嗰幾個好區，屋價唔平。其實整體嚟講，列斯既屋價同曼城差唔多。如果想平少少，可以考慮吓南部另一個城巿Wakefield。
當然，北部都有唔好區，就係喺正Roundhay旁邊既Harehills。如果大家仲記得早幾個月列斯發生過騷亂，連巴士都燒埋，嗰個地方就正正係Harehills。如果大家想知道仲有邊啲唔好區，可睇返呢份報道：
第二個係讀書：同其他地方一樣，列斯當然有好多好學校，但如果數到中學，一般嚟講大家都認為Allerton High School同Roundhay School比較好，兩間都喺北面。
第三係交通：列斯最大問題係公共交通唔好，冇鐵路，巴士服務又唔好，冇車搞唔掂。又或者只可以住巿中心啲Apartment。
第四係食：如果要搵中國嘢食，基本上你去列斯大學附近就會搵到。仲有一間華人超巿叫成記，入面有一間酒樓，都叫唔太差。至於其他國家既菜式就好多啦。好多人話英國冇啖好食，但我覺得列斯唔算係，只係貴咁解。當然講多嘢食，唔計倫敦，首選利物浦。
咁平時列斯人有咩好做呢？列斯有個好大既公園叫Roundhay Park，距離著名旅遊城巿York亦唔算太遠。當然，同好多大城巿比，列斯真係冇咩好行。真係要過返好似香港咁既花花世界，落倫敦啱你啲。
總結一句，一般本地人對列斯既評價係一個精品城巿，雖然唔大，但樣樣都有，而且冇咁混亂。據聞近來有啲香港朋友，因為曼城越來越逼，開始搬嚟列斯，我屋企附近亦開始有啲香港人鄰居。
如果你未嚟過列斯，歡迎嚟行吓。去巿中心然後去Kirkgate Market行吓，食吓生蠔同港式嘢，之後再去York兜一轉都幾唔錯。
