如果你係咖啡愛好者，有蒲開「香港鳩沖咖啡關注組」，相信都會聽過咖啡名人心媽呢個名。原來心媽喺三年幾前嚟咗列斯定居，除咗經營網店「Sheep Mai Mai」之外，仲同屋企人開咗間日式咖啡店「Suki Leeds」，主打喺列斯好少見嘅手沖及虹吸咖啡，佢哋仲要堅持咖啡豆係喺香港烘焙，空運嚟英國；更重要係，比起香港，呢杯虹吸咖啡真係一啲都唔貴！
喺英國，咖啡可以話係國民飲品，咖啡店成行成巿。但如果你係咖啡愛好者，可能會發現佢哋賣嘅主要係加入大量牛奶，大大杯嗰種美式咖啡，或者極濃郁嘅義式咖啡，而我哋喺香港飲到，講求香味同細膩感嘅日式咖啡就比較少見。但其實，列斯都有一間專賣日式手沖及虹吸咖啡嘅咖啡店Suki Leeds，仲要係香港人開嘅，一杯虹吸咖啡只係賣£5.8，真係一啲都唔貴。
Suki Leeds位於列斯嘅South Bank商業區。入到去，第一個感覺係好乾淨裝飾得好有心思。當中有一塊掛畫，寫住「鳩沖」兩個大字。細問之下，原來係出自香港嘅咖啡愛好者Facebook 群組「香港鳩沖咖啡關注組」。呢間店嘅老闆心媽同佢喺香港創立嘅咖啡品牌「Matafa」，係香港咖啡界嘅活躍份子。
據知，心媽之前喺香港，除經營網店之外，仲定期開班教授煮咖啡嘅技巧。三年幾前，佢因家庭理由嚟到列斯定居。除咗開設新嘅網站「Sheep Mai Mai」，賣咖啡相關產品外，仲同家人一齊開咗呢間日式咖啡店Suki Leeds。
心媽話，因為佢曾經喺日本留學，對日式咖啡有研究，所以喺香港推廣日式咖啡同咖啡文化。同其他咖啡相比，日式咖啡更講求層次，強調豆嘅原味。而呢度所用嘅咖啡豆，更加係由香港嘅烘焙師烘焙，空運嚟到英國。所以話，如果你想飲返香港精品咖啡店嗰陣味，我諗喺列斯冇咩地方好得過呢度。
筆者自問唔識飲咖啡，所以專登同個識飲而且對飲食好奄尖嘅朋友去試。佢試咗招牌虹吸咖啡後，第一句就大讚話好飲。老實講，呢杯咖啡係心媽親自沖俾你飲，喺香港都未必有機會飲到。
除咗咖啡外，佢哋仲有賣日式熟食好似日式丼飯、小食同甜品。午餐時段一個丼飯只係賣£9，再飲埋杯手工咖啡，相信好多咖啡迷都會好滿足。
另外，店入面仲有一個專櫃售賣Sheep Mai Mai嘅產品，包括喺香港烘焙嘅咖啡豆、用品同精品等等。
以前喺香港，好多人都鍾意收工後同朋友去飲吓咖啡傾吓偈。原來依家喺列斯都可以過返呢種生活。筆者做呢個「香港人店」系列，最大感受係有一班香港人，好似喺一個森林入面好努力咁開墾，漸漸令呢個陌生嘅地方變成舒適的家園。筆者自問冇佢哋咁叻，只能背後支持，希望各位香港人喺呢個新嘅屋企生活得更自在。
| Suki Leeds |
| 地址：111 Water Ln, Holbeck, Leeds LS11 5WD |
| 營業時間： |
| 星期一至三：11:30 -15:30 |
| 星期四、五：11:30 -15:30, 17:30 – 21:00 |
| 星期六：12:00 – 21:00 |
| 星期日：休息 |
| IG：suki.leeds |
