記得當年初初嚟到列斯，想搵啱食嘅日本嘢並唔容易，有次試過去幫襯啲本地人開嘅日本嘢，食完好懷疑啲刺身係唔係喺Costco入貨。直至後來，列斯終於開咗第一間啱我哋嘅日本餐廳，就係今次要介紹嘅Umee Sushi。不經不覺，呢間喺Chapel Allerton嘅日本餐廳已經開咗接近兩年，近日仲推出咗專俾香港人嘅現金八折優惠。
香港人食日本嘢可以話由細食到大，所以食到好奄尖。特別係壽司同拉麵，如果唔係食開嗰陣味，就自然會好抗拒。所以記得啱啱嚟到英國時，食呢度啲日本餐廳，即使有本地人誠意推介（例如巿中心某連鎖拉麵店），都總係覺得唔對路。
呢個情況一直維持到大約兩年前，正當大家仲係講緊列斯係美食沙漠，連Flat Iron開張都要去排隊之際，啱我哋口味嘅食肆開始越嚟越多，而第一間由香港人開設嘅日本餐廳Umee Sushi，就係喺呢段時間喺Chapel Allerton開業。
記得當年經過佢哋門口，見佢哋仲裝修緊，老實講真係有期待。到佢哋開鋪，幫襯過，雖然成間鋪連餐牌都冇一粒中文字，但已經估到應該係香港人開，因為食落去係我哋食開嗰種味道，嗰一刻真係有啲感動，因為終於可以喺列斯食到啱食嘅日本嘢！
直至後來，先知道呢間餐廳嘅老闆Kenneth真係來自香港。據佢講，大約五年嚟到英國，深感呢度冇乜啱口味嘅日本餐廳，所以就決定喺列斯開店，希望可以凝聚到移民嚟到列斯嘅香港人。
Kenneth表示，佢哋原本打算開喺17區，但一直搵唔到合適嘅鋪位，只有退而求其次搵落少少嘅Chapel Allerton。其實佢依家個位幾好，因為就喺通去17區嘅主要馬路旁邊，對面又有超巿Co-op，停車場可以泊兩個鐘。
呢兩年，列斯開多咗好多日本餐廳，《種子新聞》都介紹過唔少。面對咁多後起之秀，Kenneth話呢兩年佢哋都儲落咗一班熟客，加上本地顧客佔一半以上，所以對佢哋影響唔太大。事實上，據聞列斯有啲日本餐廳嘅老闆，自立門戶之前都係喺佢哋度工作過，可見依家列斯叫多咗嘢食，佢哋功不可沒。
不經不覺佢哋已經開咗接近兩年，所以佢哋啱啱推出咗兩周年優惠，香港人用現金的話可獲八折優惠，計落真係幾抵食！
老實講，去到一個陌生嘅地方做開荒牛真係唔容易，Kenneth都話，當年剛剛開鋪時真係要排除萬難，如今生意終於穩定落嚟，過程真係經歷過唔少。我諗好多香港人嚟到英國之後都係咁，但只要心存正能量，一直向前行，總係會搵到出路。
| Umee Sushi |
| 地址： 110 Harrogate Rd, Chapel Allerton, Leeds LS7 4NY |
| 營業時間：星期日至六，12:00 – 22:00 |
| IG ：umeesushi_leeds |
