有日，朋友話佢一向幫襯開嗰間喺巿中心嘅日式外賣店開咗間新餐廳，仲要喺較多香港聚居嘅17區，咁我哋梗係要即刻走去試吓。去到發現，呢間裝修得幾靚嘅新店，老闆其實喺香港開咗十幾年日本餐廳，難怪呢度上至食物出品到服務到裝潢都真係做到嗰種氣氛。我哋鍾意食日本菜，要好食之餘，有時仲要講求成個配套。
記得我哋初初喺列斯定居，真係想搵舊正常啲嘅壽司食都有啲困難，唔係嗰啲會俾茄汁你嘅，就係啲飯煲到過晒龍。直到呢一兩年，有質素嘅日本餐廳多咗，後尾仲發現到原來連Kirkgate Market都有刺身賣，食日本菜開始變得唔係奢侈品。但諗深一層，我哋鍾意喺日本或者香港食日本菜，有時唔單止係因為啲嘢好食，而係講求成個氛圍：裝修擺設、服務，最好有個師傅棟喺吧枱前面幫你即場整嘢食。而我覺得，今次要介紹呢間喺Moortown嘅日本餐廳Hikari Sushi & Ramen可以俾到你呢種感覺。
我哋去幫襯嗰日，原來只係佢哋新開張嘅第五日。去到，其實上上下下都已經好企理，無論係大大張吧台、裝修，以至餐牌設計，感覺上都係真係一間日本餐廳，可見明顯老闆係有經驗。細問之下，原來老闆叫剛師傅，身兼大廚嘅佢喺香港開咗日本餐廳已經有十幾年。佢喺香港嘅日本餐廳叫「活一鮮」，依家分別喺西環同大角嘴有分店，相信可能呢度有啲讀者都曾經幫襯過。
剛師傅話，佢啲家人較早嚟到列斯，覺得生活唔錯，於是佢年幾前都嚟到列斯定居，仲同另一位曾經喺香港開餐廳嘅拍檔一齊喺巿中心，開咗專做日式外賣嘅Kitsu Go，後來見生意上咗軌道，就決定開餐廳。
食物方面，既然佢哋叫得做「壽司及拉麵」，咁我哋當然要試吓呢兩樣。首先係我最鍾意嘅魚生飯，一上枱，第一個感覺係做得好精緻，飯面上用咗類似花之戀嘅擺法，配上厚切魚生，另外啲飯撈咗赤醋，但酸味唔會太喧賓奪主，一啖食落去幾滿足。
至於拉麵，坦白講因為每個人嘅口味都唔同，有啲客人會比較鍾意濃同厚嘅湯底，但又有人會覺得啲湯厚過頭會太膠，另加麵質軟硬又有唔同要求。而我覺得呢度啲湯底係偏向清爽，麵條則比較彈牙，係好食嘅。
我覺得，一間餐廳做得好唔好，可唔可以喺呢個競爭愈嚟愈大嘅巿場脫穎而出，首要係啲出品keep唔keep到水準，其次係睇整體細節做得足唔足。特別係做日本菜，有時就係睇呢啲位可唔可以一直堅持落去，而呢啲就係日本人所講嘅「匠人精神」。始終剛師傅有超過廿年日本料理經驗，我相信佢哋一定可以延續到呢份精神。
| Hikari Sushi & Ramen |
| 地址：400 Harrogate Rd, Moortown, Leeds LS17 6PY |
| 營業時間：星期日至六 12:00 – 21:00 |
| Whatsapp訂位 : +44 7933 898813 |
| FB : https://www.facebook.com/hikarisushi.uk/ |
