相信列斯嘅朋友都知道，想去飲茶就去東方城，但其實以前仲有一間酒樓叫冠豪，不過早前就已經結業。其實冠豪依家已經開返，不過就一分為二，第一間就係喺巿中心嘅「四喜私廚＋杏記甜品」，而另一家就係今次要介紹嘅「冠豪點心」。
喺列斯，好多朋友都會好懷念去冠豪飲茶，好可惜已經執咗。有次咁啱撞到酒樓嘅老闆MiMi，佢話因為舊鋪嘅業主加租之餘，仲要求佢哋翻新間鋪。因為需要投資嘅成本太大，只能無奈結業。但因為酒樓嘅一班師傅做咗好耐，過去做咗十幾年嘅基業就咁冇咗十分可惜，所以佢決定將班師傅一分為二：做開小菜嘅就去咗新開嘅「四喜私廚＋杏記甜品」，而點心師傅就去咗呢間「冠豪點心」。
雖然話係新開張，但其實佢哋依家只係合租人哋間鋪。間鋪原本叫G-Woo，係一間主要做外國人生意嘅中式餐廳。因為主要係做夜晚，朝早就俾咗冠豪做點心。所以間鋪嘅裝修設計好唔似酒樓，窗台仲整咗幾個花樽喺度，仲有個水吧，感覺似餐廳多啲。再加上佢喺Moortown而唔係巿中心，門口又只係得張紙貼喺玻璃窗，唔細心留意都唔會發現，所以人流唔太多。
當然，作為一間食肆最緊要係食物質素，睇餐牌，點心種類都幾齊全，另外仲有炒粉麵飯之類。因為我哋人少去幫襯，只係點咗幾個點心同一碟乾炒牛河。雖然之前有網民講過，佢啲點心麻麻地，但我就覺得又唔可以以偏概全，例如腸粉幾好，唔會蒸到散晒，乾炒牛河亦係一貫以前冠豪酒樓嗰種味道。另外要讚嘅係服務唔錯，我覺得如果係想同朋友坐低傾偈，呢度係唔錯嘅選擇。
至於價錢，其實都係£5左右一個點心，但店員話，如果加咗入佢哋個Whatsapp Group，依家可以有八五折優惠，咁計落又平啲喎。
當然，佢都有其缺點：第一就係泊車唔方便。佢哋門口個停車場只有一個鐘免費，想泊車，只能泊喺附近嘅街邊。另外，可能天氣凍，啲點心唔夠熱，但始終佢哋只係開業咗個零月，相信以後會有所改善。
依家列斯可以飲茶嘅地方唔多，但據聞喺一川風月附近，會開多一間酒樓，依家裝修緊，希望到時會有更多選擇。
| 冠豪點心 |
| 地址：G-Woo Restaurant Bar Takeaway, 300 Harrogate Rd, Moortown, Leeds LS17 6LY |
| 營業時間：周五至周三：11:30 – 5:00 （周四休息） |
| FB：https://www.facebook.com/crownleeds/ |
