報告指應急準備「嚴重不足」英國呼籲每家儲備三日物資 

43
上個月政府忽然宣布,要求英國家庭要儲備最少三日物資,當時正值俄烏戰爭戰火持續,俄羅斯總統聲言要用戰術核彈政擊烏克蘭,不禁令英國國民大為緊張,但其實政府作出如此呼籲,原因都只係希望國民防患於未然。(AI生成示意圖)

早兩日有朋友去完Costco,發現啲樽裝水俾人掃晒,後來去其他超市,雖然仲有得賣,但只係得返啲比較貴嘅品牌,平時賣好平一pack有廿枝嗰啲都缺貨了。當中原因,我諗各位喺英國生活嘅朋友都聽聞過,係因為政府呼籲每個家庭要儲備三日物資,以應對「突發情況」。不如就趁星期一(16日),英國上議院國家韌性委員會(National Resilience Committee)表示國民面對網絡攻擊、極端天氣同供應鏈中斷等威脅「嚴重準備不足」時,同大家溫習吓要點樣應對。

政府內閣辦公室(Cabinet Office)喺上月22日推出名為「Be Ready」嘅應急準備運動,係一個為期三年嘅全國宣傳運動嘅第一階段。政府呼籲每個家庭準備好應付三日嘅必要服務中斷,例如停電、停水、冇手機訊號或者冇網絡。政府指,法國、愛爾蘭同荷蘭都有類似建議。

國防大臣施卓添四出呼籲國民要及早應對。(網上圖片)

國防大臣施卓添(Wes Streeting)就成為咗運動最受注目嘅「代言人」。佢呼籲市民「保持警覺,但毋須驚慌」(alert but not alarmed),又強調政府並唔係針對某一個特定危機,只係希望大家有危機感,並唔係打到嚟,所以唔使咁緊張。佢建議每個家庭都應該要儲備以下物資作不時之需:

政府嘅清單分九大類:

・水:每人每日約3公升飲用水,三日即每人約9公升;煮食同清潔要另外預多啲
・食物:唔使雪、唔使煮都食得嘅食物,例如罐頭(記得備開罐器)。
・衛生用品:搓手液、濕紙巾
・照明及保暖:電筒、後備電池、毛氈、厚衫
・通訊:電池或手搖式收音機,同埋一個充滿電嘅尿袋(筆者建議買太陽能尿袋)
・現金及文件:唔同面額嘅現金(以防電子付款失靈)、身份證明文件,另外寫低重要電話號碼同本地電台頻率
・藥物:急救包同必需嘅處方藥
・嬰兒用品:尿片、預先調好嘅奶
・寵物用品

運動推出之後,市面出現一輪「備戰」購物潮。據報超市 Iceland 嘅罐頭銷量增加四成,Maplin 嘅電筒銷量急升284%,尿袋需求亦增加106%。

上議院:網絡攻擊可以一環扣一環

不過,國家韌性委員會周一發表報告,直接國民依然準備不足。該報告題為《我們準備好了嗎?建立韌性文化》(Are we ready? Building a culture of resilience)。委員會主席寇辛斯女男爵(Baroness Jean Coussins)形容:「網絡攻擊可以好快演變成停電,然後交通停頓,然後超市貨架清空。」

報告亦指,英國嘅糧食同藥物儲備有限,令國家面對全球供應鏈中斷時「危險地暴露」於風險之中。報告又點名俄羅斯、中國同伊朗,指佢哋可能進行網絡攻擊,甚至破壞海底電纜同輸油氣管道。

藥物方面,英國已經冇本土抗生素生產商,好大程度依賴中國進口。衞生部要求部分藥物要有八星期嘅「緩衝庫存」,但委員會質疑如果中斷時間長,呢個份量未必夠,促請政府投資本土生產必需藥物同埋藥物原料。報告亦要求水務公司證明喺長時間停水期間都可以維持緊急供水,並建議立法規定公私營機構定期做壓力測試。

報告另外反對當局計劃停播數碼地面電視,認為危機期間市民會因此少咗一個接收資訊嘅渠道。委員會又認為政府應該向公眾披露更多潛在威脅,指透明度高反而會令市民安心,唔會引起恐慌。

寒流下更要做足準備

報告發表之際,英國北部正受寒流影響。氣象廳周二凌晨就英格蘭北部同蘇格蘭南部發出降雪黃色警告,而衛生安全局(UKHSA)嘅黃色低溫健康警示會維持到周四(19日)上午9時,覆蓋西北部、東北部同約克郡及亨伯。氣象廳預計,本周後段天氣會轉得更冷,但會較乾爽。

原來有唔少人係唔知屋企個供水總制喺邊,因為有啲可能喺屋外,又有可能喺啲隱閉地方,所以大家都可以預先去check吓。(網上圖片)

結冰天氣最常見嘅家居問題係水管凍裂。British Gas 提醒,冇包好嘅水管遇上零度以下會結冰爆裂,解凍時可能漏水甚至水浸。佢哋建議預先用 DIY 店有售嘅保溫物料包好水管,並且要知道總水掣(stopcock)喺邊。如果水管已經結冰,可以慢慢淋暖水(唔好用滾水),或者用暖水袋解凍;懷疑爆咗就要即刻關總掣、開水喉放水,再搵合資格技工處理。室溫方面,British Gas 建議恆溫器設喺18至21度之間。

對在英港人嚟講,Be Ready 清單入面唔少嘢屋企本身已經有,例如尿袋、電筒同罐頭。比較少人預備嘅,可能係足夠嘅樽裝水、少量現金,同埋一部唔使插電嘅收音機。趁寒冬未到最凍,執一執屋企都唔係壞事。