英國職員及學生請病假 《GTA 6》開賣首日暴升

75
等咗足足13年,《俠盜獵車手6》終於上市,不過今次遊戲主線嘅「䧳雄大盜」並在DEI文化下加持,令不少玩家認為今集失去了GTA系列一貫嘅靈魂。(遊戲畫面)

等咗足足13年,《俠盜獵車手6》(Grand Theft Auto VI,GTA6)終於喺星期四(19日)午夜正式解鎖。估計之前好多人都估到會有大批人請假,而實際數字一出,返工返學兩邊都真係受到衝擊。其實呢隻Game主要喺愛丁堡嘅Rockstar North開發,所以英國都叫做沾得到光,就唐寧街都形容佢係「英國成功故事」。但其實玩過呢個遊戲嘅讀者都知,今集唔單止冇得好似上集咁四圍溝女、召妓,甚至連殺死DEI嘅NPC都唔得。於DEI文化加持之下,坦白說今集GTA6,其實好唔GTA。

先講銷量。分析公司Sensor Tower估計,GTA6截至發售當晚已經賣出約2,460萬份數碼版,連埋預購收入大約23.6億美元(約18億英鎊),差唔多係上一集GTA5首日收入嘅3倍。英國本地零售都好熱鬧:據報John Lewis嘅遊戲機同配件銷量按年升62%,Currys嘅PS5銷量更加升咗149%。

病假急升56% 請假多兩成

事實上,喺遊戲正式發售之前,網上已經有唔少人話會請假打機。據人力資源系統BrightHR嘅數據顯示,星期四嘅病假人數比上星期四急升56%。另一間HR公司Deel就指,星期四嘅請假申請比去年同期多咗21%。

遊戲開始冇耐,男主角仲係幫人收租整屋嘅時候,竟然俾租客(前女友?)著性感比堅尼引誘,當然事後咩都冇發生,但呢段已經係前期最出位嘅內容。(遊戲截圖)

換句話講,有啲人老老實實放年假,亦有唔少人索性「病」咗。St Albans嘅玩家Sam Elward就表示,請咗4日年假,仲使咗差唔多1,500英鎊買電視同訂製手掣,準備好好打返一輪。不過佢自己都承認,發售嗰晚頂唔順,捱唔到夜等午夜開機。

至於學校嘅請假數據亦不遑多讓:學校管理系統Arbor收集咗超過1,400間中學嘅早上點名紀錄,初步數據顯示:星期四缺席嘅中學生,比星期一至三平均多出大約35,000人,係過去兩星期出席率最差嘅一日。

其實唔少學校早就預咗有呢個情況發生。伯明翰嘅Ninestiles學校為咗鼓勵學生唔好請假,特地為成個星期都有返學嘅學生安排禮券抽獎;另外,杜倫郡Bishop Auckland嘅St John’s天主教學校,就喺星期四出席嘅學生之中抽出一位,送出65英鎊Amazon禮券。睇返個缺席數字,呢啲「利誘」似乎都係擋得一時。

唐寧街:英國成功故事

因為今集GTA主要由位於愛丁堡嘅Rockstar North開發,有啲英國血統,所以英國多位政客不忘出嚟抽水。除咗唐寧街公開盛讚佢係「英國成功故事」外,改革黨更索性借勢搞笑。改革黨議員詹里克(Robert Jenrick)喺網上分享咗一段AI製作嘅惡搞片《Grand Theft Jenrick》,片中佢嘅虛擬化身打擊罪案、壓低生活成本,仲提到佢由保守黨跳槽。另外黨魁法拉奇(Nigel Farage)亦拍片扮打機,但手上嘅手掣根本冇開機。兩段片喺社交平台X上都被網民大肆恥笑。

法拉奇拍片扮晒嘢係打GTA 6,但被網民發現個手掣冇著燈。(網上圖片)

事實上,英國政界對呢個暴力18禁遊戲嘅反應就比想像中溫和。保守黨領袖巴德諾赫(Kemi Badenoch)早前被問到會否擔心GTA6教壞細路。佢表示,比起遊戲有幾暴力,佢更擔心小朋友花幾多時間打機。佢舉例話,一個成日困喺房打機嘅細路,同一個打半個鐘就出去玩嘅細路,係兩回事。佢亦坦言自己從來冇玩過呢個系列。

學校、警方:18禁唔適合細路

不過,呢個遊戲始終係18禁,內容涉及大量殺人放火、販毒及色情內容,故引來學校同警方嘅關注。

肯特郡Strood嘅Maritime Academy喺發售前發電郵畀家長,強調遊戲屬18禁,唔適合學生,又擔心入面有極端暴力內容。教育雜誌Tes報道,Astrea旗下一間學校更直接呼籲家長唔好幫仔女買,仲建議喺遊戲機設定家長控制。多間學校都提到遊戲有暴力、成人主題同粗口。

英倫海峽根西島(Guernsey)嘅警方就提醒家長,遊戲可能令細路接觸到血腥暴力、斬首等令人不安嘅畫面,以及唔健康嘅關係。警方仲呼籲家長,唔好因為自己細個玩過舊版GTA,一時懷舊就畀仔女玩。

大批「GTA Online」嘅玩家正期待因GTA6而推出嘅新版「GTA Online 2」,但估計要到下年先出。(網上圖片)

好老實,等咗足足十三年,而且上代GTA5陪伴好多人度過咗唔少個寒暑。因為GTA5有一個網上多人遊戲模式叫「GTA Online」,有網友就話,喺Covid被困家中嗰兩年,就係靠喺「GTA Online」維持社交生活,故在GTA6發售前一晚,大批「GTA Online」用家喺遊戲內發起名為「最後一夜」嘅派對,歡呼將「搬到」今集嘅新城市繼續生活。一隻Game可以變成社會現象,環顧歷史都好似未見過。