電影《尋秦記》喺英國上映，當然要入戲院緬懷一下，畢竟電視版《尋秦記》已經事隔廿五年，小弟亦係已故原作者黃易先生的書迷。先講觀後感：作為一套sell情懷，甚或一套新年電影，呢套電影版可謂合格有餘，但另一方面，沙石較多，故事亦有不少犯駁之處。筆者認為最大問題係呢個延伸故事，冇咗原故事嘅神髓，「荊軻刺秦王」應該有更理想的表達方式。
睇《尋秦記》電影版之前，梗係要煲返當年套電視劇。喺英國，上Youtube就搵得到全套劇睇，好方便。筆者早年睇過原著小說，感覺係電視版雖然比較簡陋（TVB出品你想點？），劇情亦簡化咗好多（例如琴清同紀嫣然變咗同一個人，連晉/管中邪/嫪毒炒埋變咗江華），但總算可以根據原著小說劇情發展，拍得出故事想帶出嘅信息。結局亦同小說分別唔大。
去到電影版，可能事先知道苗僑偉個角色叫阿Ken，好容易令人聯想到「Ken軻」呢個人同「刺秦王」呢段歷史，所以好期待電影劇情會點樣發展落去。
因為呢件大事的確係一個非常好嘅切入點。秦王生死之間，以及故事主題「天命最高」，都可以根據呢件統一前嘅重大歷史事件而表達出嚟。我相信，如果在黃易先生筆下編寫呢段劇情，會比較偏向歷史發展，即使荊軻真正身份係好似項少龍一樣來自未來，佢都會沿住歷史軌跡演譯呢段故事。因為《尋秦記》本來就係歷史穿越劇嘅鼻祖，對往後廿幾年內地文學及影視作品影響深遠。這才是本作品在華人文壇的最大成就。
（以下有劇透）
但結果發現，故事只係講阿Ken，帶同幾個完全冇隊形嘅隊友，返到秦國殺秦王，原因仲只係為咗一個私人理由。
據歷史，戰國末年秦國統一六國時，總軍力達一百二十萬，秦軍每次出兵都最少十幾二十萬人。加上手下猛將如雲，秦王絕少會親征同離開皇城。所以感覺阿Ken靠幾個人就幾乎可以殺死秦王，令佢要搵項少龍求救嘅橋段就好難成立。
有咗呢份不協調感，到後來睇到阿Ken班人做乜自己留低個通話器唔用，硬係要用項少龍冇電嗰個，以至入到皇宮扮秦王，明知敵人嚟緊，但槍都唔帶枝防身，就知唔可以帶住呢種心態去欣賞呢部電影。
的確，一如好多朋友咁講，呢套電影係賣情懷、賣回憶。就如電影開場，一播返電視劇主題曲《天命最高》，的確會令人有莫名嘅感動。電影中穿插咗好多電視劇嘅片段，睇返廿幾年前嘅古天樂同林峯，又真係會勾起好多回憶。再加埋一眾當年嘅電視劇演員如郭羨妮、滕麗名同宣萱等等，當在銀幕上見返廿五年後嘅佢哋，感覺真係似見返班老朋友。
所以，如果你當年有追過呢套電視劇，我係會好建議你入場睇呢套戲，因為在廿五年後續拍一套戲嘅廿五年後，機會不多了。
據聞呢套戲早喺六七年前拍落，眾所周知，近年大陸對穿越及歷史劇嘅限制大大提高。作為一套合拍片，《尋秦記》應該會受到好大影響。睇得出嘅例如頭幾幕，角色說話唔對嘴形，明顯對白後期執過，更甚是拍了兩個結局，都有可能是為咗符合內地要求而作出改動。
據聞，如果今集收得，電影版可能有下集。結果此片在港打破咗華語片開畫票房紀錄，即係下集有望。不過希望唔好再係合拍片了，今集雖為合拍片，但就冇合拍片應有嘅大場面。拍得呢啲題材，千軍萬馬係基本，既然冇，咁又何必受到掣肘呢？
