列斯日韓餐廳Oba半價 實測究竟有冇伏

記得初初嚟到英國，走去食過某大連鎖壽司店，驚訝加驚嚇，自始對本地日本料理有啲陰影。但近來朋友話列斯巿中心有間日韓餐廳做緊Promotion，逢一至四全日半價，而且食物唔錯，所以我地就決定去試下究竟有冇伏。

今次介紹呢間餐廳名叫「Oba Korean & Japanese Kitchen & Bar」，位於巿中心Merrion Shopping Centre嘅外圍。今次Promotion基本上係餐牌上嘅散叫（即係唔包餐）都係半價，計落又真係好抵。

去到坐低，間餐廳幾靚，而且座得舒適。樓上應該仲有一層，但中午應該冇開。

今次我哋就點咗四個散叫嘅食品：韓式蜜糖炸雞、鰻魚丼、彩虹卷同天婦羅。

食完之後結論係雖然啲嘢食有啲瑕疵，例如炸雞啲雞應該事先冇醃過、鰻魚飯份量比較細，天婦羅汁冇跟蘿蔔蓉之外，其實並唔差，好似天婦羅炸得夠脆而且冇乜油，又食得飽。最緊要係對得住個價錢：雖然呢間餐廳有加一，但半價後埋單都只係£26，喺列斯巿中心算好平了。

據店員講，呢個Promotion會去到一月尾，逢星期一至四全日有效。小記中午去其實都爆滿，如果各位諗住夜晚去最好都係訂定位。

其實踏入一月，好多本地人過完聖誕後就唔捨得使錢，所以有啲食店都會趁呢段時間做Promotion。若我哋再有發現會繼續為大家報道。