首先要提提你，列斯聖誕巿集2024的結束日期係明天22/12晚上七點，如果你睇完呢篇文想去行吓的話，就要快啦，如果唔係就要等下年了。至於今年的列斯聖誕巿集，一如以往有得食有得玩仲有得溜冰，當然最吸引我哋，係巿集的聖誕氣氛。當香港越來越禁止慶祝「洋節」，嚟到英國，自然要出嚟感受吓普天同慶的氣氛。
外國人行聖誕巿集，就好似中國人要行年宵咁，一年一度點都要出黎湊吓熱鬧。至於今年列斯聖誕巿集，相比起上一年，地方集中咗；另外有位本地旅遊記者話，去完York嗰個把鬼既聖誕巿集後，覺得列斯呢個超正。美中不足只係啲嘢食好貴，而且仲好難食。咁究竟係唔係呢？等我哋去試吓咯。
今年巿集主要分做兩個地點，分別是City Square同千禧廣場，合共有大約七十個攤位。簡單講，City Square主要係買同食；而千禧廣場則主要係玩同食。
去到City Square，最吸引當然係投射喺Queens Hotel上面既大型聖誕燈畫。燈畫旁邊就係食檔同賣嘢檔，例如有賣傳統聖誕熱紅酒（mulled wine），好靚但甜到爆的土耳其糖，以至手工藝品等等。至於食方面，當然漢堡熱狗薯條沙威瑪等等一定有，比較特別係有一檔類似港式雙餸飯，都係煮定一大盆筆吓筆吓咁，但一樣餸加一個飯或炒麵底的Mead Deal要£9定£10，所以冇試到。另外亦有珍珠奶茶同雞旦仔檔。
行完City Square後，可以繼續行去千禧廣場，步行距離大約十分鐘。千禧廣場主要係遊戲區，大量機動遊戲例如旋轉木馬、咖啡杯、小型跳樓機等等。但最吸引同比較少見既，第一個係The North Pole；簡單地講，The North Pole係一條三層樓高的滑梯，玩家由地下一路行上三樓，途中既行人通道會有啲機關，會郁或者會轉等等，中間亦都有啲任務要你做。當然，呢個遊戲係俾小朋友玩，但其實由三樓望返落黎，飽覽整個聖誕巿集都幾靚。（每位每次£4）
至於食方面，筆者都會信漢堡同德國腸熱狗多啲，另外，另一檔忌廉磨菇同超長薯條都真係幾好食。只係四樣嘢加埋要三十幾鎊，雖然兩個人食堅飽，但講真真係唔可以話平。
第二個係小型溜冰場「Ice Cube」，門票係£11.5一位，小朋友、列斯居民等有少少優惠，所以唔算貴。另外，佢會一直開到31/12。
其實除咗聖誕巿集之外，列斯喺今個聖誕都仲有好多活動，例如有藝術家巿集同表演等，詳程可以瀏覽以下網站：
泊車
巿中心啲停車場大約£3一個鐘。所以最抵應該係泊John-Lewis 喺Victoria Gate的停車場，黃昏五點後，£5泊一晚。步行距離到City Square同千禧廣場大約十五分鐘左右。
