近來《種子新聞》介紹咗幾間喺列斯嘅香港人餐廳，感謝各位讀者支持，反應唔錯。有位讀者仲PM我哋，話佢住嘅17區有間唔錯嘅外賣店，係香港人開，好值得推介。好坦白，我諗同好多嚟到英國嘅香港人一樣，一聽到中式外賣店總會有幾分戒心，始終有啲舊式外賣店，一向係做本地人生意，佢哋啲「中菜」未必啱我哋口味。但今次要介紹呢間Mr Takumi，幫襯完後絕對有驚喜，個鴛鴦炒飯真係掂！
啱啱嚟英國嗰陣，列斯冇乜香港人開嘅食肆，有次唔識死，走去幫襯啲中式食店，就係嗰啲有唔同醬汁，好似甜酸、豆豉之類俾你揀，然後就有啲好鞋嘅雞胸肉撈埋俾你食。試過之後，好自然會對呢類「中餐」有啲抗拒。
所以去今次要介紹嘅Mr Takumi之前，上網睇佢哋個Menu，見到又係甜酸、宮保呢啲，仲要係全英文，不禁有啲擔心。但見嗰位讀者講到話好好食，就硬住頭皮都要去試吓。點知一去到，完全唔係嗰回事：原來佢哋仲有另一set餐牌，有齊香港人食開嘅菜式，而且竟然仲有傳說中嘅鴛鴦炒飯！
小弟好鍾意食鴛鴦炒飯，白汁蝦仁加茄汁雞絲，一啖滿足晒兩種願望。不過依家莫講話英國，香港啲茶仔都唔多見了，原因不外乎多工夫，一碟飯幾乎要煮兩次。既然呢間Mr Takumi連咁麻煩嘅嘢都肯整，我相信佢哋真係唔係外表睇落咁「本地」。
負責收銀落Order係一位好開朗嘅女仔叫Cherish，係老闆個女，佢一見我哋係香港人就話全單九折，然後介紹我哋睇佢哋嘅「廚師餐牌」：咖哩牛根腩、南乳豬手、中式牛柳、雙冬羊腩煲，仲有麻辣雞煲同原隻海南雞等等，全部都係香港人啱食嘅口味。Cherish仲話佢哋其中一位師傅以前喺香港專門做海南雞，可惜要預先訂，否則一定要試。
Cherish話，佢哋其實已經頂手咗呢間外賣店有一年時間。佢爸爸好鍾意煮嘢食，以前喺香港亦做開飲食，嚟到英國之後出去打咗一段時間工，學識咗點樣營運之後，就決定喺較多香港人聚居嘅17區開咗呢間外賣店。我哋去幫襯當日係星期六，可以用客似雲來嚟形容，廚房入面竟然有五位師傅再加埋老闆娘，但依然「風煙四起」煮到唔停手。
另外除咗唔少外賣員出出入入外，仲有好多本地人幫襯，難怪佢哋要keep住呢個咁「本地」嘅餐牌。我問過其中一位白人顧客，佢話自己住喺附近，經常嚟幫襯，仲大讚呢度啲嘢好食。我見佢同Cherish有講有笑，就知佢真係好鍾意呢間外賣店。
我哋幫襯咗大約四十幾鎊，一家四口已經飽到食唔晒，除咗份量大之外，佢哋仲有買滿幾多錢之後就送多一個餸嘅優惠，近排有日式餃子同椒鹽雞翼等，然有仲有外賣店必備嘅一大包炸蝦片，真係飯後小食都有埋。
據嚟英國嘅老一輩所講，八十年代好多香港人移民嚟到英國之後，都係開中式外賣檔，但後來好多都已經賣咗俾福建人。佢哋為咗迎合本地顧客嘅口味，或多或少都會同我哋食開嘅有啲分別，更唔好講有啲所謂「呃鬼佬」嘅中菜。而呢間Mr Takumi雖然外表仲係一間「鬼佬外賣店」，但內容依然係一個香港人嘅「心」，所以值得推薦。
最後要提一句：有啲讀者可能見我哋係咁介紹餐廳，懷疑我哋係唔係寫膳稿。其實我哋做呢個「香港人店」系列，主要係希望香港人可以多啲幫襯香港人開嘅鋪頭。始終大家都明白，要喺一個陌生嘅地方展開新生活並唔容易。我哋訪問過嘅鋪頭，係我喺真係試完覺得唔錯先會去介紹，完全冇錢銀瓜葛（連Discount都唔會攞），所以如果大家發現有啲食肆／鋪頭值得我哋推介，歡迎PM話俾我哋知。
| Mr Takumi |
| 地址： 706 King Ln, Leeds LS17 7AW |
| 營業時間： |
| 星期四至二16:00 – 22:30（星期三休息） |
| FB：https://www.facebook.com/p/Mr-Takumi-61569612496988/ |
