夠用心港式小店 列斯冰室 Foods Stop

早排返香港，赫然發現某大連鎖快餐店將焗豬扒飯升格做「非物質文化遺產」，既然吹到咁大，點都要試吓，結果係感覺同以前冇咩分別，食咗唔夠一半就決定唔好浪費Quota。返到英國後，近日發現喺列斯嘅港式餐廳「列斯冰室 Foods Stop」近來推出咗期間限定嘅港式茄汁焗豬扒飯，試過之後，我嘅結論係感受到老闆Alfie對食物出品嘅執著。

相信好多Morley嘅街坊都曾經幫襯過之前喺Morley Market入面嘅Foods Stop。當時佢哋主要賣港式小食，例如魚旦燒賣菠蘿包之類。大半年前，佢哋搬咗去Wortley，除咗多咗個中文名叫列斯冰室外，菜單亦都多咗好多飽肚嘅食物，例如炒飯同撈麵等等。另外，佢哋亦會按時令推出唔同嘅限時精選，就好似近來臨近農曆新年，佢哋會有年糕同蘿蔔糕預訂等等。

雖然新鋪係喺一個住宅區嘅Corner Shop，但好處係門口可以停到車。新鋪唔大，大約只有十個位，但裝修得幾骨子。睇餐牌，除咗一向都有嘅魚肉燒賣、咖哩三寶同沙嗲牛肉之外，仲加咗好多熱食，例如臘腸炒飯、蔥油雞扒飯等等。另外仲有今次要介紹嘅焗豬扒飯。試過之後，我覺得呢個焗豬扒飯真係俾足心機去整，因為依家即使喺香港食，好多快餐店因為時間成本關係，飯底已經唔會係炒飯，而呢度嘅焗豬扒飯，除咗用炒飯底之外，茄汁同芝士份量亦都好夠，一啖食落去都幾滿足。

我點解話佢哋夠用心，係因為佢哋好多材料都係自己花時間去整，而唔係就咁買現成。例如最簡單嘅咖哩豬皮，一般做法通常係買一塊塊已經炸好嘅豬皮返嚟浸，但Food Stops就竟然係買生豬皮返嚟，先起走晒啲脂肪之後再攞去風乾，然後再去炸。筆者試過，又真係比一般用現成燒豬皮整出嚟嘅口感較為綿密。除此之外，佢哋近排仲有自家製嘅新鮮豬油同潮式辣椒油賣，雖然唔係咩好複雜嘅嘢，但可見佢哋真係好俾心機做好出品。

雖然因為人手關係，呢度嘅餐牌選擇唔算多，但例如港式奶茶、沙嗲牛肉麵、雪菜肉絲米、魚旦燒賣等等都有供應，喺列斯，已經係少有嘅選擇，總算可一解思鄉之愁。不過以前喺Morley Market 有賣嘅蛋撻同菠蘿油就變咗期間限定，下次有機會再去試試。