如果大家有留意社交媒體又鍾意煮嘢食，應該都會識得黃大爸（Habibie）。上年年頭有次同朋友食飯，佢就話可以試吓當時新開咗唔係好耐，由黃大爸同佢太太Emma主理嘅「The Rising Sun x Habibie Gastropub」。試過之後，以後我每次去開Stockport就幾乎指定要去食佢哋嘅海南雞飯。
相信好多朋友都係透過社交媒體認識黃大爸，睇過佢出Post交流烹飪心得，知道佢未嚟英國之前曾經喺葵涌開私房菜。後來朋友話，佢喺曼城嘅Stockport開咗間Gastropub（即係提供美食嘅酒吧），唔只啲嘢好食，仲可以飲吓啤酒睇吓波，啱晒傾偈吹水，咁當然要去試吓。
The Rising Sun x Habibie Gastropub其實喺Bredbury一條街嘅中間，要泊車的話，一係就去Bredbury火車站嘅Park and Ride停車場，再唔係就揸落少少泊街邊。據講，原址The Rising Sun Inn係一間酒吧，前年十月左右，黃大爸同佢太太Emma就頂咗嚟做，所以一入到去，好明顯係酒吧格局，平時仲有好多本地人街坊嚟飲酒。有啲本地人見到我哋食嘢，仲會好奇走嚟問我哋究竟食啲乜。
至於食物方面，可能因為Emma本身係印尼人，所以主打東南亞美食，例如有菠蘿炒飯同印尼炒飯，另外亦唔少得有海南雞飯等等。
小弟喺香港係海南雞迷，平時會食半隻海南雞當一餐。但眾所周知，英國啲雞同我哋喺香港食開嘅唔同，喺香港，我哋食開黃油雞，雞皮較厚脂肪亦較多，雞肉比較滑。而英國啲雞就冇咩皮下脂肪，胸肌比較厚，如果用喺香港相同嘅方法去整，雞胸肉會好鞋好難食。所以我就專登叫咗呢度嘅海南雞飯，我相信呢道菜應該係間餐廳好唔好食嘅指標。
而結論係，雖然層皮比較薄，但雞肉依然夠滑，加埋黃油飯，可以話我喺英國食到其中一碟最好食嘅海南雞飯。
因為佢哋係一間酒吧，所以有好多適合送酒嘅小食，例如台式盬酥雞，試過係鬆脆可口。另外，有次仲咁啱食到傳說中嘅錦鹵雲吞，都可以話係香港嘅舊情懷。
另外，據聞呢度嘅馬來咖哩牛筋腩飯好好食，有機會再試。
睇報道，原來四年前黃大爸嚟咗英國之後，曾經喺幾間食店打工，了解本地巿場，以預備未來喺本地開餐廳。依家呢度上咗軌道，成為咗Stockport香港街坊嘅食堂，據說佢哋將會喺Whitefield開多間外賣店，可見佢哋真係好受歡迎。
嚟到英國之後，我諗大家身邊總有啲朋友抱怨連連，又話天氣凍又話搵食艱難，回流返香港嘅亦時有聽聞。但其實就好似今次同大家分享呢個故事咁，只要有心，喺英國同樣可以創造出理想嘅生活。
| The Rising Sun x Habibie Gastropub |
| 地址：57 Stockport Rd E, Bredbury, Stockport SK6 2AA, United Kingdom |
| 營業時間：星期一至日12:00–23:30（廚房20:30截單） |
| FB：https://www.facebook.com/p/Habibie-Gastropub-x-The-Rising-Sun-61567055254865/ |
