去Nottingham，朋友激推介一間魚生飯。因為間舖喺Derby而唔係喺巿中心，都好奇點解會專登揸車走去食。咁試過之後，結論係呢間由香港人開嘅魚生飯店唔單止啲魚生夠新鮮，仲要唔貴，入門級雜錦海鮮丼只係賣£8.98，堅抵，我喺Kirkgate Market 食碗越越南河都£9啦！
香港人嚟到英國，其中一個要解決嘅問題就係要搵到啲啱口味嘅日本嘢食，刺身壽司魚生飯，以及拉麵係必然之選。筆名喺英國食過嘅魚生飯，除左價錢貴少少之外，另一通病係好細碗，小弟麻甩佬一名，通常就咁食一碗都唔飽，更唔好講啲飯量比我仲大嘅本地人。
但今次幫襯呢間鮮Umami Derby，除咗食得飽之外，魚生份量亦好足料。除左最基本嘅雜錦魚生丼外，其他魚生丼嘅魚生全部都係厚切，一啖咬落去真係勁滿足。
據老闆講，其實呢間鋪係Warrington同名嘅鮮Umami嘅分店，佢曾經幫Warrington店嘅老闆打工，後來有志創業，就落到嚟Nottingham闖天下。
咁我同佢講，叫佢快啲嚟列斯開返間，因為以前食開嗰間頂咗手俾人。佢話如果各方有志之士有興趣，叫佢自己同Warrington總店傾喎。
整魚生丼其實真係唔使咩花巧嘢，最緊要食材夠新鮮，用料十足就已經好夠。而我覺得佢哋有心，係連啲魚生豉油都係佢哋自己校過味，唔會因為價錢平就求其整支萬字豉油俾你，所以值得推介。
可能因為Nottingham有好多香港人定居，所以近年愈開愈多啱我哋口味嘅好嘢食，下次再介紹一間長期爆滿的茶餐廳。
地址：4 Nottingham Rd, Borrowash, Derby DE72 3JU
營業時間：星期三至日： 11:00 – 20:00，星期一及二休息
FB：https://www.facebook.com/share/1Q1GJNb5pV/
