有日個女學校有活動，夜晚唔得閒煮飯，唯有買外賣。上網睇下有咩好嘢食，竟然搵到一間賣章魚小丸子，大阪燒同日式咖啡嘅外賣店，而且價錢唔算貴，再加上一睇個Menu就知應該係香港人開，咁就點都要去試下。
Oishi Kitchen位於大學區邊皮位置，附近大都係學生宿舍。跟地圖揸車去到，發現係一間屋仔，門口有個好大用日文寫住店名嘅招牌。店唔大，只有兩個位，估計係俾人坐喺度等外賣，其他地方都係廚房。
睇餐牌，主要係日式嘢，但全部係熟食，例如章魚小丸子、咖喱飯、炒麵、烏冬同日式小食如餃子之類。飲品就係大熱嘅珍珠奶茶。
因為主要係做學生生意，價錢並唔算貴，一客咖喱飯八鎊幾，學生meal deal 加埋嘢飲都係十鎊，所以吸引咗好多學生經常嚟幫襯。
呢間餐廳吸引到我，原因係佢哋嘅章魚小丸子似我哋喺香港食到嗰種，除左有原味之外，仲有其他如蜜糖芥末等口味。建議係即買即食，因為如果拎到返屋企先食，就肯定會冧咗冇咁好食啦。
老闆娘叫Katrina，好後生，據佢講呢間舖原來已經開咗兩年，係由佢同老公合力經營。因為佢屋企人做開飲食，所以佢哋移民嚟英國後就決定做餐車，之後就搬咗嚟呢間舖至今。
咁點解我幫呢篇文起題叫《鐵血日式外賣店》呢，原因係佢哋堅勁。Katrina話，當年做餐車其實非常辛苦，一來要四圍去，二來時間好長。試過參加一個活動，大會要Set 場，九點要集合，佢哋就要清早起身備料，然後揸車去利物浦，到收檔返到屋企已經深夜十二點，洗完嘢備完料冇休息得幾耐又要出發。
佢哋之所以由餐車搬入外賣店，係因為有咗小朋友，當時要大住肚做餐車，試過要喺寒風之中做生意，可以想像非常辛苦。不過，雖然搬咗落舖，但依家兩公婆同時要開舖以及照顧初生小朋友，又係另一種挑戰。以前小朋友仲係B，帶佢返舖冇問題，但依家大咗識四圍走，喺廚房就危險了。所以幫襯當日，淨係見老闆娘一個炒呀炒，老公就要留喺屋企照顧小朋友。可以想像平日食晏時間肯定做到一頭煙。
Katrina仲話，每年六月到十月，因為啲學生搬走晒，佢哋基本上係冇生意，所以舖頭平時冇辦法請人，佢哋呢段時間亦只有出去搵Parttime，做吓貨倉或者揸吓車之類幫補生活了。其實淨係呢份鐵血精神，都值得大家去支持吓啦。
雖然生活好充實，但見佢仲係笑笑口咁努力工作，喺呢個地方建立自己嘅生活。坦白講，嚟咗英國咁耐，實會遇過啲好多埋怨嘅人。我覺得，其實凡事都係講心態，只要向前望，總會搵到自己嘅方向。
| Oishi Kitchen | |
| 地址： 33 Blackman Ln., Woodhouse, Leeds LS7 1LW | |
| 電話號碼： 07471 057242 | |
| 選單: oishikitchen.square.site | |
| IG：oishi_leeds | |
| 營業時間： | |
| 星期一 | 10:00–14:00, 16:00–21:00 |
| 星期二 | 休息 |
| 星期三至六 | 10:00–14:00, 16:00–21:00 |
| 星期日 | 16:00–21:00 |
