早前收到風話Morley開咗間香港人開嘅日式拉麵店，某日拉麵癮起，專程揸車走過去食。因為我屋企距離Morley成半個鐘車程，去到，諗住可以立即大快朵頤，點知發現門口竟然有一條非常長嘅人龍，結果我等足一個鐘先食到呢碗傳說中嘅足料靚湯底拉麵。
我諗嚟到英國嘅香港人，總會研究過點樣自己整日式拉麵，始終拉麵可以話係好多香港人嘅主要糧食，平均一兩個星期點都要食一次。嚟到英國，賣拉麵嘅大型連鎖店唔係冇，但總係覺得食落有啲唔同，例如湯底唔夠濃，麵又太軟等等。
至於今次要介紹呢個間「13 Noodles」，據朋友講，最出名就係佢哋個豬骨湯底。咁真係要試試。
「13 Noodles」其實喺 Morley 室內巿場入邊，地方唔大，而且大部分地方都間咗做廚房，出面只有五張枱，大約二十個位。呢間其實本身係麵店，所以有港式茶餐如沙嗲牛肉以及五香肉丁麵，仲有港式奶茶檸茶等供應。
不過我諗大部分顧客，都係為咗佢碗拉麵而嚟。據老闆講，佢哋嘅湯底係自己用豬骨用足心機餚制而成，因為只有真係用豬骨餚，啲湯底先會有濃同厚的感覺。
事實上，有啲麵店的確為咗慳錢慳時間，會就咁用豬骨粉開湯，上桌時再加返少少炆叉燒嘅汁落去就諗住過關。但對我哋呢啲食拉麵食大嘅人嚟講，咁樣好易食得出，之後就冇下次。
因為當日太忙，只係能夠同老闆傾咗兩句。佢話自己喺香港做開飲食，所以嚟到英國後，喺上年年尾開咗呢間麵店。至於啲湯底，佢指住廚房一字排開一行鋼煲，入面全部都係湯底，可見真係俾心機落去煲。
食完之後，的確唔錯。美中不足係間舖座位比較少，星期六同家人去食有排等（因為佢哋星期日唔開，一星期只係開五日，嚟緊五月仲會只係開四日！），不過收到風，佢哋有考慮搬間大啲嘅舖，對我哋呢啲列斯人嚟講可以話係好消息。
| 13 Noodles |
| 地址：Unit 9, Morley indoor Market, Hope St, Morley, Leeds LS27 8DS |
| 營業時間：星期一、二、三、五、六，早上九點到下午四點半，但佢哋五月嘅星期一都會休息 |
| FB：https://www.facebook.com/share/1CNLAMujpY/ |
