喺香港，經常聽聞乘客們因讓座的問題而引起爭執，甚至令「關愛座」要改名做「批鬥座」。但諗深一層其實好少事，始終車程都唔係太遠。但嚟到英國，同樣問題可能麻煩十倍。日前就有一名女士，因為拒絕讓座而引起爭論。
據《曼徹斯特晚報》報道，一名女士乘搭頭等火車，從倫敦出發到蘇格蘭鴨巴甸。但上車後才發現，自己的座位竟被編排了在「優先座（即香港的關愛座）」。
當時，一名大約六十歲的女士走過來，指著她頭上「優先座」的標誌，要求她讓出座位。她當然不肯，一來車程長達七個小時，二來頭等車票其實好貴。兩人講吓講吓就嘈起來，一個表示自己預約了座位，當然不肯讓座；一個話個座位是「優先座」，車卡內也沒有其他座位，所以對方應該要讓座俾佢。
結果，有一名火車的警衛過來調停，發現那位老女士雖然買了頭等車票，但沒有預約座位，換句話說佢要等列車有空位先有得坐。但她堅稱她有權優先坐「優先座」，所以，即使警衛表示，可以在普通等的車廂搵個位俾佢，她亦堅決地拒絕。
警衛又問訂咗位的女士是否願意坐普通等，咁佢自然又拒絕。到最後，始終因為佢預訂了座位，老女士只能夠去普通等搵位坐。
事後，這名女士把事件的經過放了上網，結果引起爭論。有人表示這是鐵路公司的問題，因她有責任為優先座位提供保障，亦有人表示這位女士沒有錯，因她提前預訂了座位，當然亦有人撐老女士，指她的確有權優先坐關愛座。咁如換轉係你，你又覺得邊個啱邊個錯？
