愈來愈香港人在列斯Kirkgate Market開店，除了早前介紹過的Amazing Gyoza外，近日又多了一間新店Q’s Station Leeds，主打港式食品如沙爹牛肉、星洲炒米等。如果你同我一樣係列斯人，忽然掛住茶記陣味，不妨去支持吓。
有次行過Kirkgate Market，忽然見到有個尚未正式營業的舖位內，有兩位香港人正忙於準備開業。八卦走去問吓，佢地話將會開一間以日本食品如拉麵及港式食物為主的外賣檔。直至昨日再走落去，佢哋亦已經開始試業，但賣嘅食品種類變咗做港式茶記。點解呢？
老闆阿勤話：「因為好多香港朋友入嚟幫襯，見到有港式食品例如沙嗲牛肉就會叫，所以我哋加多咗港式食品的款式。」
睇餐牌，Q’s Station Leeds除咗固定有嘅麵餐外，仲有好似港式茶記嗰啲 ABCD午餐，例如星州炒米、咸魚雞粒炒飯以及麻婆豆腐飯等，而且餐牌每日都唔同，有三至四款可供選擇。
阿勤話，佢哋移民嚟英國已經有四年，因為曾經在香港做飲食，所以一直打算在英國開餐廳。但找了很久也找不到合心水的地方，直至後來才決定落戶Kirkgate Market。
眾所周知，其實Kirkgate Market夜晚休息，星期日又唔開，對食店嚟講並唔理想。不過阿勤話，咁樣反而可以照顧小朋友，對家庭沒有太大影響，所以可以同太太齊齊夾手夾腳開檔。
不過，佢嚟呢度最唔慣，反而係經常要等：「其實我哋九個月前已經決定喺呢度開業，但淨係同佢哋開會都要半年。我哋要經佢哋做招牌，但依家都未做好。」
「其實我哋仲有好多嘢，例如裝修都未執好，所以依家只係試業階段。」
至於今次我哋試咗幾樣嘢食，第一樣係經常喺佢哋餐牌出現嘅羅宋湯扭扭粉，我相信係因為有食客讚過，所以餐牌先成日會有。另外點咗港式沙嗲牛肉烏冬同芙蓉蛋飯，好大路而且好正路，可以話冇得輸。
呢度反而最吸引我，係好有香港啲茶檔feel，兩夫婦夾手夾腳開檔，然後前面有幾張枱，可以同啲食客吹吓水，大家同聲同氣，其實都幾唔錯。
| Q’s Station Leeds |
| 地址：Stall 523 Row 5. Kirkgate Market Kirkgate Leeds LS2 7HL |
| 營業時間：星期一至六，早上十點到下午四點 |
