相信唔少香港人嚟到英國之後，都會諗過去擺市集，賣吓自己做嘅精品，甚至賣小食好似魚蛋燒賣雞蛋仔。不過，面對陌生嘅環境同法規，有時都唔知點入手。所以，今次我哋趁介紹嚟緊七月三號至五號，喺列斯Corn Exchange舉行嘅「Wishes & Stars」市集，專程訪問咗今次市集嘅搞手阿Jane，問佢到底要有咩手續，先至可以喺市集擺檔。
Pop-Up market其實喺英國好普遍，以列斯Corn exchange為例，幾乎每個星期都有舉行，不過大部分都係本地人搞，由香港人搞嘅，通常都係大時大節，例如新年、元宵、中秋節等。一開始，好多香港人市集都係由港人組織CIC開始搞，但依家已經有唔少Event公司會搞得比較頻密，以曼城為例，某搞手幾乎個個星期都有搞市集。
咁到底要點想先可以成為檔主呢？首先，每個主辦商、每個市集其實都有細微分別，咁我哋就以阿Jane講佢嘅要求為例子：
當你租到到一個攤檔，如果係室內，大會通常就會為你預備一張長枱及椅。如果係室外，咁要問清楚，有啲主辦會提供帳篷，有啲主辦商會要求檔主自備，亦有部分可以安排租借，視乎活動而定。
你可以用個人名義申請開檔，唔一定要開公司（當然年尾你要用sole trader嘅身分報稅），但就一定需要購買Public Liability Insurance，一般要求最少 £1 million cover，部分活動或場地會要求 £5 million 或 £10 million，視乎活動規模及場地要求。保費方面通常約 £50/年起，一次性活動保險約 £27 起，視乎業務類型及保額而定。基本上好多英國嘅保險公司都可以喺網上買到。
除保險外，部分主辦方或場地亦會要求提交 Risk Assessment 文件。
如果你只係賣乾貨，其實就係咁簡單。但如果你想賣熟食，咁要求就比較嚴格。除咗Public Liability Insurance之外，檔主或主要負責整嘢食嗰位人兄，需要考獲Level 2 Food Safety and Hygiene Certificate，基本上只要上網考試就可以攞到，一般考試費都係十零鎊。通常主辦商真係會Check你張Cert，因與同主辦商嘅Public Liability Insurance有關。
另外，攤擋要整一個「Food Allergy Sign（食物過敏告示牌）」，即係你平時去餐廳，會喺當眼處大大隻字貼喺度嗰張。呢個告示牌其實係為咗符合英國食品標準局（FSA）嘅法規要求，需要列明食物是否含有致敏源。網上其實有好多template俾你下載，又或在直接去Amazon訂返個都得。
第三，如果你賣嘅食物係預先包裝好，就需要受Natasha’s Law嘅限制。如果你係現場煮，再預先包裝好嘅食物，就要喺每一款食品貼上標籤，詳細列明完整成份列表，致敏原須以粗體顯示；但如果你係喺其他地方煮好（例如喺其他地方製作嘅蛋撻、糯米糍之類），再喺現場賣，咁就要完整標籤，包括成份、營養資訊、最佳食用日期、儲存方法、生產商資料等。
呢個標籤只需要你自己整，可以用空白嘅標籤貼紙，用printer印上去，然後貼喺食物包裝盒就得了。當然資料要準確，你可以去政府Food Standards Agency（FSA）網站查閱，會有完整指引。
如果你係現煮現賣，咁就唔需要整標籤，但都要問清楚顧客有冇食物過敏。
第四，亦係最頭痕，就係食物檔主需要向council申請「食品業務登記（Food Business Registration）」。
首先檔主要喺正式營業前嘅廿八日申請，費用全免，亦都可以用你屋企個廚房作為生產地址。基本上你登記完後，就可以開始營業。不過，Council會上門檢查（可能係數星期以至數個月之後）你個註冊地點嘅清潔、冷藏、烹調溫度、個人衞生等等因素，然後會俾個食品衞生評級（0–5星）你。如果佢評定你嘅衛生條件不符合標準，就會要求你改善甚至勒令停業。
即係話，可能你申請完，擺完檔，Council都未嚟，不過我諗大家都明白英國啲嘢就係咁。
詳細資料可以參考呢個網址：
https://www.leeds.gov.uk/environmental-health-for-business/food/register-a-food-business
終極建議
大家諗住去擺檔，無非都係想賺返啲使費。首先要考慮，當就係租金同會搞幾多日，市集租金差異其實相當大，由 £20 起都有。例如部分社區活動或小型市集收費較低；而部分大型活動、特色市集或食品節則可能高得多。好似曼城某些香港人舉辦的年宵市集，手作攤位收費已可達約 £100一日。
部分大型 Food Festival 並非採用固定租金模式，而係用保底租金加營業額分成方式運作。不過，租金高低未必直接反映活動質素，有時租金較低嘅活動宣傳資源亦相對較少，人流未必理想，所以檔主需要自行衡量。
好似上文所講嘅Corn Exchange市集，租金較平，約£60一日。通常星期六嘅生意係最好，所以當日嘅租金會係浮動價，可以直接問返主辦商。
至於市場舉行嘅日期都係考慮因素，有啲朋友會視擺市集係part time，會偏向啲只係搞一日嘅市集，但其實move in move out 都要成本，搞多幾日好似會抵啲。另外有啲市集可能會搞幾日，但可以俾檔主只係租其中一日。
第二，有啲市集，為咗唔想啲位有重覆，令活動內容更多元化，所以會要求你交個List，列明你會賣啲乜。例如有啲大熱食品如魚蛋燒賣，就會因為咁而唔俾你賣。
至於邊個可以賣啲乜，唔同市集嘅招募方式亦有所不同。有啲活動採用先到先得形式；有啲則會先收集申請，再按產品類型、活動主題及整體組合作篩選，所以最緊要事件同主辦單位溝通好。
第三，如果你需要用電，通常會受到嚴格限制。因為有啲場地其實未必提供電力供應。以Corn Exchange為例，主辦單位需要作出額外安排，因此會產生額外成本。一般而言，如主辦方能安排供電，通常都會額外收費。檔主亦應遵守用電規定，確保使用符合要求的設備，避免超出負荷造成跳掣。例如事先講明只能夠帶一樣電器用具，就唔好帶多幾個，因為一跳電，成個場都做唔到生意。
如果真係要用得多電，甚至要用到三相電，有啲主辦單位可以俾你自備發電機，不過當然要問淸楚。
第四，好多時，主辦商同檔主係合作關係。據阿Jane所講，佢希望做到雙贏，既希望活動成功舉辦，亦希望檔主 可以賺到錢、建立客源，同大家長期合作發展。另外好多檔主，通常會跟開一兩個主辦商咁去做，有啲主辦商鍾意全國四圍去，咁大家就會一齊去唔同地方擺檔。
睇返成個英國，其實呢類市集越來越多，唔同主題嘅都有。大家可以諗吓自己賣嘅嘢，到底啱邊類主題，然後作決定。如果做得好，據阿Jane講，試過一個攤位一個星期六可以做七百八百鎊生意，大家話吸唔吸引呢？
最後加多句，阿Jane話，除咗上述嘅「Wish & Star + 台灣夜市」市集，嚟緊嘅中秋節都會有市集，如果大家有興趣擺檔，可以直接聯絡佢：
| Email：ohmorugarden@gmail.com |
| WhatsApp：07919 737337 |
