記得早幾年喺香港，有一間來自大阪嘅米芝蓮二星級日式料理「壽司芳」進駐尖沙嘴，引起過一陣風潮。原來該店其中一位廚師近日落戶列斯，加盟喺大學區新開嘅「hey! sushi」。筆者去試過，感覺係以佢哋喺列斯冇得輸嘅質素，價錢真係親民，以我個女最鍾意食嘅稻荷壽司為例，外賣價都只係鎊零唔使兩鎊。回想起啱啱嚟到列斯時，想搵舊好食啲嘅壽司都有困難，依家真係幸福咗好多。
近來朋友介紹，話列斯大學附近開咗間新壽司店，仲請咗位三十年經驗嘅香港人師傅嚟坐鎮。起初以為價錢應該唔平，但去過之後，發現價錢唔算貴，對得起質素有餘，外賣仲要有折，以兩件花之戀為例，竟然只係賣£4.5，喺香港，食到有返咁上下質素嘅都要呢個價！
細問之下，原來呢為師傅叫文傑師傅，曾經喺香港二星級日式料理「壽司芳」，跟嚟自日本嘅大師學藝。其實當年喺香港，都聽聞過呢間來自大阪，以特色壽司為賣點嘅過江龍。除咗香港之外，佢哋喺台北都有分店，但價錢唔平，壽司 omakase 收費過千。後來文傑師傅離開咗「壽司芳」後，又去咗米芝蓮一星團隊Momotaro工作，直至近來佢嚟咗英國，就加盟咗呢間新開嘅「hey! sushi」。
hey! sushi 喺大學區，對正列斯大學，喺中超恆星行隔壁。如果大家有食開日本料理，都可能知道呢間鋪前身係一間omakase日本料理，去年八月底已經轉手。新老闆一向做開飲食，因為鍾情日本菜，就頂咗手，保留日本檜木裝修，仲改行大眾化路線。以文傑師傅嘅手藝，價錢就真係唔貴，難怪筆者去幫襯當日，一直其門如市，唔少學生哥走嚟幫襯。
作為一間壽司鋪，最緊要當然係啲出品得唔得。據筆者所知，其實英國嘅日本食材供應商主要係得幾間，如果間鋪頭肯落本用啲貴啲嘅來貨，咁其實都會有一定水準。但要在芸芸眾多日本料理中脫穎而出，就真係好睇個師傅嘅功力。舉個例，好多鋪頭都會喺壽司飯入面加醋，但其實即使係最 common 嘅醋，都有唔同味道嘅分別，有啲可能偏甜，有啲會比較酸，要點樣令到啲飯配合到唔同魚及海鮮食材嘅味道，就係分出高下嘅關鍵。又例如我個女最鐘意食嘅稻荷壽司，事實上喺英國入口到嘅腐皮大都比較甜，要點樣令到佢冇咁甜，唔好太過搶，又係考師傅嘅功力……再講落去真係有排講。
咁 hey! sushi 呢舊壽司得唔得呢？我感覺係文傑師傅真係做得到以上所講嘅要求，而且仲要唔算貴，實在冇咩可以挑剔，喺列斯可以話冇得輸。
除咗壽司之外，hey! sushi 仲有好多熱食值得推介。第一樣係拉麵，因為筆者食慣濃味，所以我點咗熊本黑蒜拉麵，比原味豚肉湯底多咗一份醇厚嘅焦香味，昇華咗一個層次；第二樣要推介嘅係溏心蛋！可能大家覺得溏心蛋冇咩特別，自己都整到，但其實整溏心蛋嘅損耗率係十分之高，特別係餐廳，冇理由整隻爛咗嘅俾你，呢度一隻溏心蛋只係賣唔使£2，老實講，良心價。
其實佢哋仲有甜品同炸雞供應。炸雞推介有雪花炸雞，都幾好食。其他想食嘅，好似炸廣島蠔同至愛鰻魚飯，因為已經食得太飽，要下次先試到了。
記得當年嚟到列斯定居，想搵好嘢食要揸車四圍去，伯明翰、利物浦、曼城、Sheffield 甚至去到諾定咸，唯獨列斯真係連似樣嘅茶仔都冇間。但隨住越來越多香港人選擇喺列斯定居，啱我哋口味嘅餐廳亦越來越多。據聞仲有嚟自香港嘅大廚考慮喺列斯開新嘅茶餐廳，到時我哋一定會為大家報道。
由此至終，《種子新聞》嘅目的都係希望大家可以更加融入英國嘅生活，如果能夠食到我哋熟悉嘅味道，或多或少都會令我哋對呢個地方，增添一份親切感。
| hey! sushi |
| 地址：22 Blenheim Ter, Woodhouse, Leeds LS2 9HD |
| 營業時間：星期一至六 11:00 – 21:00 （星期日休息） |
| IG：hey_sushi_leeds |
