早幾日，有位讀者PM我哋，話列斯Pudsey開咗間香港人開嘅新餐廳。去到發現，呢間餐廳原來只係開咗唔夠一個月。除咗英式早餐同三文治之外，仲有唔少港式美食如西多、沙嗲牛肉同炒麵飯之類，星期六日仲有唔同嘅特色港式美食供應，例如上個星期有牛雜，今個星期就有碗仔麵同生菜魚肉，住喺列斯嘅香港人終於有更多選擇啦！
其實好耐之前都知道列斯Pudsey有間由香港人開，但主要做本地人生意嘅Café叫「CAFE BY HISE」，但因為佢哋營業時間比較飄忽，所以未幫襯過。原來唔夠一個月前呢間餐廳已經轉咗手，就係今次要介紹嘅「EUTOPOS CAFE 依度蒲餐廳」。
餐廳喺馬路邊，但門口有六個車位，泊車都方便。新老闆叫Carmen，佢話因為佢屋企喺香港開茶餐廳已經三十幾年，所以幾個月前嚟到英國後，決定重操故業。睇餐牌，Carmen話因為呢度有班固定嘅本地人顧客，所以保留咗好多例如英式早餐同埋凍三文治等等，但同時又加咗好多啱香港人嘅美食，如港式咖哩牛腩飯同沙嗲牛肉炒麵等，特別係晚餐（只限五時後供應），仲有好似以前喺花園餐廳食嗰種鐵皮雜扒餐同盬焗雞飯等等，可以話係喺列斯少有嘅選擇。
採訪當日，隔離枱有位太太帶埋仔女同啲朋友嚟幫襯。佢哋對呢度讚口不絕，除咗推介我哋一定要食咖央西多之外，仲話佢哋做食做得好有心，所以短時間內已經幫襯咗六、七次。咁我嘅印象係，可能Carmen有經驗，佢位拍檔阿達亦喺香港做過私房茶，所以食物的確好有水準，而且真係有心去做，舉個例子，有啲茶餐廳沖凍檸茶嘅茶底，為咗貪快，會就咁撞啲冰落啲熱茶度，咁做會令個茶底變得混濁。如果你見到杯凍檸茶沖出喺係清嘅，就係佢哋要慢慢咁令啲熱茶降溫。老實講，即使喺香港，好似呢間餐廳咁沖得出一杯合格嘅凍檸茶亦已經越來越少了。
另一個我覺得呢間餐廳夠鐵血嘅原因，就係佢哋嘅營業時間超長，依家竟然係開足七日，逢一至五仲要朝八晚六。Carmen話，其中一個原因係佢哋要照顧唔同顧客之餘，佢哋依家仲係喺摸索階段，所以暫時會開長啲時間。其實佢夜晚仲有私房菜食，而且幾好生意。阿達話，私房菜每位大約£25，但其實扣除食材成本，都只係剛剛夠俾佢哋三個人嘅最低工資，可見佢哋為咗啲客都真係唔多計較。嚟緊新年，佢哋仲有盆菜食，有興趣可以同佢哋聯絡。
筆者喺香港做過好多年飲食版，結論係做得好嘅餐廳嘅成功要素，除咗唔怕辛苦之外，最緊要有心做，尤其係好多唔顯眼嘅細節要做得足，因為只要啲出品差咗，食客好易食得出，就唔會再幫襯了。其實EUTOPOS係希臘文，意思係「烏托邦」或「好地方」，希望呢間新餐廳可以一直Keep到水準，令我哋列斯人真係有個「好地方」去「依度蒲」。
最後順帶一提，如果各位讀者知道列斯有啲香港人開嘅餐廳或小店值得我哋推介，敬請PM我哋啦。
| EUTOPOS CAFE 依度蒲餐廳 |
| 地址：639 Stanningley Rd, Stanningley, Pudsey LS28 6NB |
| 營業時間： |
| 星期一至五 08:00 – 18:00 |
| 星期六及日 10:00 – 16:00 |
| FB : https://www.facebook.com/profile.php?id=61583859638754 |
