早排趁住新年假去咗諾定咸，朋友極度推介去一間叫「金星冰室Venus-Café」食蔥油雞扒飯，仲話之前有朋友去探佢地，要一連兩日都去幫襯，但講明等位等到儍。試完後就知點解咁多人幫襯，因為好食又唔貴之外，最緊要係佢嗰份正宗港式茶餐廳嘅味道。但事先聲明，佢哋呢排又放緊假，到下月四日先開返，想幫襯就留意時間啦。
金星冰室唔係喺巿中心，而位住於NG8，揸車去，發現入咗個住宅區，然後區內公園仔對住零零丁丁有三間鋪，其中一間就係呢間茶餐廳。但好處係好容易泊車，如果唔係咁凍，一面等位一面玩吓公園仔都好。
雖然我哋有訂位，但去到依然等咗半個鐘。原因係金星冰室大概只係有三十個座位，但就勁多人，啲客塞爆晒間鋪都有啲逼。餐廳應該係家庭式經營，睇往佢哋團團轉咁忙過不停，難怪佢哋間唔中就會放吓長假，一兩個星期，甚至好似今次咁，放成個月假唔開。
雖然朋友推介雞扒飯，但我見到餐牌上竟然有「元朗炸脾飯洋蔥汁」，咁梗係要試，結論係呢隻炸脾係用港式炸雞脾嘅方法去整，而洋蔥汁亦做得出我哋食慣嗰種螢光蕃茄汁嘅味道，所以我好快就成碟掃晒。
另外，去到茶餐廳梗係要食沙嗲牛肉，所以點咗沙嗲牛肉炒麵（炸麵底）。筆者覺得個麵底係夠脆，但應該食返肉絲炒麵味道會比較夾。
最後點咗個鹹魚雞粒炒飯。有朋友話，睇一間餐廳得唔得，可以睇吓佢碟炒飯炒成點，我覺得呢碟炒飯炒得夠乾身，亦唔太油，最緊要係雞肉唔會過熟，我個唔太鍾意食飯嘅女都掃咗半碟。
幫襯完後，終於明白點解咁多人幫襯：首先價錢唔算貴，例如乾炒牛河都只係£9，另外就係出品有水準，雖然鋪面掛咗個大大嘅招牌「九流師傅」，但我覺得如果唔係個厨房大佬有料，肯定唔敢咁玩。最後就係，成間鋪掛滿啲Mirror嘅宣傳品，要我對住Anson Lo食飯，係囉呢啲就係港味囉。
最後再要講多一次，我幫襯完之後，金星冰室就開始於差不多一個月假，至二月四日先會再次營業，大家去開諾定咸可以去試試。
| 地址：19 Ambergate Road, Nottingham, NG8 3GD, Nottingham, United Kingdom |
| FB：https://www.facebook.com/p/Venus-Café金星冰室-100089426036858/ |
