屯門日式餐廳登陸牛津 漁匠屋嘆足料海鮮丼 

小弟細個屯門大，後來做傳媒，一直有聽聞過屯門有間隱世日式小店叫「漁匠屋」。後來有次同朋友喺虹橋附近個獅子會球場踢波，幫襯過一次，印象中啲刺身丼幾好食。嚟到英國，有日朋友同我講，Bicester有間日本餐廳新開幾唔錯，去到竟然發現，原來呢間「漁匠屋」（Gyoshoya），正正就係我喺屯門幫襯過嗰間。

漁匠屋以前喺屯門一個叫虹橋嘅地方開鋪，因為同巿中心有距離，又唔近西鐵站，所以通常都係本區居民幫襯。但當年有傳媒讚佢係「隱世小店」，其中一個原因，係呢間家庭式經營嘅日本餐廳，個師傅係日本人，而且用料新鮮又足料，所以即使位處山旮旯，仍有知音人專程去幫襯。

據老闆娘阿Man講，佢哋三年前嚟英國之後，首先喺牛津郡Bicester的超市內開日式外賣檔，直至約半年前先喺Bicester巿中心開餐廳。

帶我去嗰位朋友叫「村長」，佢話其實喺牛津已經幫襯咗佢哋好耐，最鍾意係買唔同款式嘅腐皮壽司返屋企食。

至於我，當然點了該店最出名的海鮮丼飯。眾所周知，呢碗丼飯得唔得，好大程度取決於啲刺身得唔得。而事實上，近一兩年，已經有高質的日式刺身入口英國，餐廳用唔用，真係好睇老闆心態。

而漁匠屋則秉承當年喺屯門開設的精神，選用的刺身好明顯係好嘢。村長更點了一個海寶丼，真係相當有水準。據講，漁匠屋嚟咗英國之後，研究如何利用本地食材加入菜單，令食品種類更有變化。

上菜時，阿Man同我哋講，佢哋係用赤醋飯，唔使落鼓油已經夠味。好彩佢提一提，因為如果好似平時咁順手倒鼓油落去，真係會好咸。喺英國，坦白講日式餐廳愈開愈多，但講到好唔好食，有時又幾參差，始終有啲鋪頭比較傾向本地人口味，我哋又未必食得慣，但今次呢間漁匠屋絕對係我哋食開嗰陣味，值得推介，如果各位下次去開Bicester掃Outlet，不妨走去試吓。