一直都知道列斯Kirkgate Market有八間港人店，其中一間係「蛋卷舖」。但因為我習慣星期一去買餸，所以一直都唔見佢開。有日因為要去採訪，終於見到佢地開門。同佢哋傾咗幾句，再睇下佢哋賣乜，終於明白原來喺列斯都可以好Chill咁生活。
Hiyaa Cafe 主打兩樣出品，第一樣係即沖嘅抹茶或烘茶Latte，標榜茶粉來自日本；第二樣係烘焙食品，包括蛋卷、餅乾、蛋撻等等。另外仲有樽裝港式奶茶，好簡單直接。
採訪當日一對夫婦Ben和Cindy在看舖。有客人光顧，一位負責沖咖啡，一位就同客人傾吓偈。這類小店好多時都係做熟客生意，食件餅飲杯咖啡，係好多人忙裡偷閒的生活習慣。
問佢哋點解會喺Kirkgate Market 開舖？阿Ben 話：「其實呢間舖係我哋個女嘅。開始時佢喺IG賣自己整嘅蛋糕，到疫情過後就決定開舖。咁我哋又退咗休，所以嚟幫手睇檔。」
據佢哋講，呢間Cafe係上年七月開張，當日選擇喺Kirkgate Market 開舖，係因為呢度啲租金唔算貴，所以見佢哋平日都係笑笑口咁，可見唔係好有壓力。
呢度啲蛋糕同餅乾等食品係佢個女Cheryl親手整。經過食家認證最好食係班蘭味同黑芝麻味，另外仲有葡撻都唔錯，當然唔少得飲返杯好濃郁抹茶味的咖啡。
再諗返成件事，一個星期開五日，然後幫個女賣吓蛋糕同啲客傾偈，成件事Chill到不得了。
好多人成日話嚟英國生活唔知點好，又悶又話冇好嘢食。我反而覺得生活係靠自己編排出嚟，即使你喺香港都係一樣。
當然又唔係個個人都可以咁Chill，佢哋可以幫個女賣蛋糕，但我仲係整緊蛋糕俾個女食，仲要俾佢哋彈話唔好食！
下次大家行開Kirkgate Market，記得去試吓。
| Hiyaa Cafe |
| 地址：Unit 33, Row E, Hall 1976, Kirkgate Market, Leeds LS2 7JH |
| 營業時間：二至五，11:30AM-4PM，周六，11AM-4:30PM |
| IG：https://www.instagram.com/hiyaa.cafe/ |
