真係有港味的茶仔 伯明翰港味茶餐廳

呢幾年，英國各大城巿都開咗好多港式茶餐廳，但好老實，有啲茶餐廳雖然有奶茶沙嗲牛肉麵食，但唔能夠正式話係茶餐廳。因為在我心目中，一間茶仔唔單止要有炒粉麵飯，仲要有小菜，而更重要的是有嗰陣香港風味。能夠集齊以上優點的，我在伯明翰唐人街搵到一間。

根據友台Seedenjoy推介，全英國有六間港式茶餐廳，能夠令你回憶起家鄉的美味，其中一間，正是位於伯明翰唐人街的「港味茶餐廳」。我第一次去，係有個住在伯明翰的朋友帶我去食，之後我每次經過伯明翰，都會去食一餐。好老實並唔係咩特別菜式，第一次食乾炒牛河（比好多中式酒樓好食），第二次去到咁啱佢哋慶祝開業兩周年，小食半價，所以掃咗一輪咖哩魚旦碗仔翅加米粉。呢間茶仔最吸引我，反而係嗰陣「真．茶仔」既味道。

英國一般茶仔，可能礙於人手，都只係會提供部分食物，但「港味」個餐牌，可以話係「茶仔Full Menu」，除咗奶茶西多腸蛋麵之類的大熱食品外，仲有炒粉麵、焗飯、小菜、車仔麵甚至港式小食；再加埋香港人店員，唔講你真係以為自己喺香港！

今次特別點了幾樣嘢：第一樣係咕嚕肉，甜酸汁味道適中，肉排炸完唔乾表面仲有少少脆，係我哋食開的味道。第二樣係肉絲炒麵。大家都知，肉絲炒麵的靈魂是「兩面黃」，即係個麵底的正反面煎得夠唔夠脆，咁呢碟炒麵當然合格。最後係叫咗一碗車仔麵。我諗係因為有啲車仔麵慣常會有的餸款，例如豬紅，喺英國較難搵到，所以喺呢度變咗麻辣鴨血，但當湯底加咗腩汁再整多個油麵，加埋牛肚豬腸，呢碗車仔麵真係可以一解相思之情。

據講港味茶餐廳係由幾位香港人合資經營，其中Marco是紅褲子出身，曾在酒店及西餐廳工作。佢哋會按天氣時節提供時令餐牌，例如端午節有五香鹹肉糉，呢排就快過年有盆菜等。神奇地，有時竟然仲有臭豆腐，我估喺英國真係好難會食到。

採訪當日，真係勁多客仲要等位。老實講我諗住喺伯明翰的香港人都應該識得佢哋。但我食完真係好食，點都要推介俾各位讀者。