有次去列斯某大連鎖店食日式拉麵，雖然好多本地人話好好味，但好老實，我只係覺得不過不失。我諗好大程度，係因為英國拉麵已經本地化，迎合本地人口味，所以對我哋呢啲食拉麵食大的香港人來說，只能夠話好過冇。但這個英國冇好拉麵食的印象，繼早前去咗位於諾定咸的Ramen Hassaku，已經完全改觀。
在英國，要食一碗好食的拉麵並唔容易，原因係麵店要照顧本地人口味。但當我哋發現部分本地人食壽司要落茄汁，就知我哋同本地人的口味有好大分別。至於點解我哋覺得Ramen Hassaku正，其實原因好簡單，就係佢哋並冇隨波逐流，堅持做一碗正宗的日式拉麵。
「我哋希望做一碗正宗的拉麵，讓本地人能夠嘗試我們的口味。」老闆娘Ada說。
這間Ramen Hassaku位於諾定咸的Stapleford區，採訪當日可謂其門如巿，客人一路都冇停過。雖然大部分係香港人，但亦有本地人幫襯。因為當日仲係聖誕假期，所以見廚房一直非常忙碌。據Ada所講，Ramen Hassaku其實開業剛好滿一年。因為他們曾在香港做飲食，所以抵英後決定繼續開食店。
一碗拉麵好唔好食，其實取決於三樣嘢：第一係湯底。Ramen Hassaku啲湯底以豬骨湯為主，湯比較濃同厚，係我哋喺香港食開的味道；第二係麵。據Ada表示，他們用的麵係用自己的配方特地搵麵廠生產，所以食落唔會好似有啲本地拉麵店咁軟淋淋冇勁道。
至於最後就係主菜同賣相。Ramen Hassaku主要賣叉燒，賣點係夠多；加埋配菜如紫菜同溫泉蛋等，感覺真係返晒嚟。更重要係唔算貴，一碗叉燒拉麵£12-13，其實喺香港食碗好少少都要呢個價。
好多人話英國冇啖好食、美食沙漠等等，但其實自從越來越多香港人來到英國後，已經有好多適合我哋口味的食店出現。除咗呢間香港人開的Ramen Hassaku外，今個聖誕仲食咗好多好嘢，下次有機會再報道。
| Ramen Hassaku |
| 地址：42 Derby Road Stapleford, Nottingham NG9 7AA England |
| 電話：+44 7391 939303 |
