第一次同各位讀者在《種子新聞》與各位見面。
首先自我介紹，我的筆名叫「小編Ｊ」，是《種子新聞》的其中一名編輯。過去曾用過其他筆名在香港多個平台如《立場新聞》、《眾新聞》及《香港獨立媒體》發表過文章。因為香港的傳媒生態已經徹底轉變，所以我同很多行家、特別是《蘋果日報》及《壹傳媒》的員工一樣，都移民走了。所以今次第一次同大家見面，不如就分享我移英後的感想和所見所聞。
坦白講，我嚟咗唔係好耐，仲係放假mode，hea緊，好聽啲叫適應緊生活。當然新生活絕對唔係一帆風順。移英有兩大最大難題，第一係天氣，真係堅凍。我真係識有朋友因為太凍決定回流返香港（雖然佢老婆係大陸人原因大啲，我覺得）。
第二係語言問題。小弟完全搞唔掂當地人啲口音。先唔好講蘇格蘭式或者印度英文，依家啲本地人講英文係唔會發”t”音，即係bottle 會變左booo，water 會變左woar，所以好多時唔知佢地講乜春。呢個問題喺南部近倫敦叫做好啲，但喺我所在的北部就好嚴重。所以如果你仲諗緊係唔係移民嚟英國，或者打算搵嘢做的話，就真係要預返一段適應期了。
當然好處係生活空間大咗，可以感受下另一種生活。例如我屋企有幾棵果樹，之前有車厘子，近來有啤梨食，都幾大個，但聞說要放喺度個幾兩個月先甜。呢啲係以前喺香港冇機會感受。
另一個唔同，就係多咗搵朋友。以前喺香港日日返工，好少見朋友。依家見人多咗，開心咗嘅。
所以到底英國生活好唔好，我諗都係取決於心態。自我感覺良好就可以生活到落去。無論係決定移民定留喺香港，每個人都會搵到自己嘅理由。好似我呢啲賣得切樓嘅，就梗係笑笑口話好彩決定移民。有啲留港嘅藍色朋友，就梗係抵你班移民撚俾人歧視死，或者吹奏祖國咁好你哋走寶等等等等。
我以前都會同朋友分析叫佢地移民，特別係有小朋友。但依家唔會啦，因為我發現真係有啲人係唔適合移民。唔識英文或者冇車牌嗰啲唔使講，移得民嘅一般都係兩個原因，一個係小朋友一個係政治原因。如果兩個原因都冇，只係諗住用六年時間攞多本護照，咁真係會好難捱，中途放棄大有人在。
我希望你睇得明我講咩啦，即係話如果你支持祖國大好河山，歌頌當今聖上英明，咁就真係唔好移民啦。
小弟愚見，香港要復甦只能夠同大灣區完全融為一體，即係無論樓價收入物價，以至語言金融法制都要完全相同，口岸港幣完全取消，香港先有機會反彈。所以我好建議各位留港的藍色朋友，不如趁早返大灣區生活，香港啲樓太貴，返惠州買返層樓咪好囉。
呢半年，見過喺英國的朋友十零萬鎊買間屋都幾唔錯，又見過朋友間五房四個半廁所後院有桑拿房嘅豪宅。結論係英國生活最重要係有選擇，有錢嘅，去倫敦生活五光十色又得，鍾意窮風流既，揸車四圍去吓風景區又唔使好多錢。
我走嘅時候香港變得好暴淚，到依家都冇好轉甚至更差。然後個政府，同曼聯個領隊一樣得把口。所以即使祖國經濟好轉，香港都未必可以跟住好。即係話，無論美國減息又好，阿爺有好轉又好，香港都會繼續生唔生死唔死咁一段時間。各位要睇路了。
呢啲就係我移英後既感受，唔知你又同唔同意呢？
