列斯Kirkgate Market近來開咗好多香港人食店，但其實在另一個港人集中地Morley，亦有新嘅香港人店進場。喺Morley Market內，除咗有之前介紹過嘅13 Noodles外，最新登場嘅係主要賣韓式食品嘅「Ha Ha小店」。早前筆者去試過佢哋嘅招牌韓式炸雞，不單抵食夾大件，仲真係幾好食，難怪連喺Wakefield嘅朋友都個個禮拜走去幫襯。
我成日覺得Morley Market好似個迷宮，而今次要介紹嘅Ha Ha小店，其實喺13 Noodles嘅另一邊。去到，發現佢哋租咗兩個鋪位，一個係廚房以及細細嘅雜貨店，主要賣香港人食開嘅嘢，而另一個就主要俾人座。去到當日係中午時份，客人一啲都唔少。其中一枱有位女士仲同我哋講，佢哋住喺Wakefield，但經常揸車過嚟食。佢嘅推介係韓式伴飯，咁我哋當然要試吓。
打開餐牌，發現價錢真心唔貴，一個meal deal，兩件雞連薯條同飲品只係賣£5.99。而且佢哋啲雞好大件，我見旁邊有對情侶點咗六件雞，最後都食唔晒要打包走。
當然，到底係唔係真係抵，好大程度要睇吓啲雞好唔好食。
關於韓式炸雞，據講傳統韓式料理只有類似人蔘雞嗰種做法，並冇炸雞呢回事。到後來美國喺韓國駐軍，啲士兵落船後四圍搵炸雞食，韓國先出現專賣炸雞嘅鋪頭。所以起初韓式炸雞比較接近美式炸雞，即係有層厚厚炸得鬆脆嘅粉漿，而唔似上薄粉嘅日式唐揚或中式炸子雞。
不過，幾十年後，韓式炸雞變咗國民美食，又開始有咗變化。現代的韓式炸雞講求外皮脆同薄，但淋上醬汁之後，外皮唔可以變軟。而且要保留肉汁，如果炸到乾晒身就唔合格了。
而Ha Ha小店呢舊炸雞，外皮真係夠硬淨，掛晒汁之餘，食落仲係脆口，而且保留到雞嘅肉汁，配合唔同嘅醬汁真係幾好食。細問之下，原來老闆Hugo以前喺香港做開西餐，難怪呢度啲炸雞夠有水準。
呢間小店係Hugo同佢partner Anna一齊經營。Anna話，其實佢哋之前曾經打算喺其他地方開鋪，但搞完一輪手續之後，依然係不了了之，故最後選擇落戶Morley Market。呢度有個好處係租金比較平，所以食物可以賣得平啲。老實講，以佢哋嘅賣價同份量，真係香港都未必食到。
除咗炸雞之外，我哋仲試咗韓式伴飯。試完感覺係料夠足，同啲韓式辣醬撈勻嚟食好滿足，只係略嫌太辣。但原來辣醬可以另上，大家要留意了。
我哋兩個人，食咗一個meal deal同伴飯，再叫多半打雞翼，但真係食唔晒。順帶一提係佢哋啲薯條同樣炸得好鬆脆，加埋海苔粉真係忍唔住食晒。
另外，店入面仲間咗一個小地方，專賣精品同適合港人嘅乾貨，例如新推出嘅熱浪蝦片同時時食夾餅都有得賣，方便住喺Morley嘅香港人。
通常食完韓國菜，間鋪都會俾粒糖你。而呢間Ha Ha Shop雖然係小店，就連呢樣嘢都有做足。我成日話，要睇一間食店得唔得，好多時就係睇呢啲細微位做得足唔足。唔係錢嘅問題，而係有冇俾心機去做，所以我覺得呢間小店值得推介。
| Ha Ha Shop |
| 地址：Morley Market, Until 73/74 Indoor, Commercial St, Leeds LS27 8AG |
| 營業時間： |
| 星期一：09:00-15:00 |
| 星期二至六：09:00-16:30 |
| 星期日休息 |
| FB：http://facebook.com/people/HA-HA-SHOP/61583510340216/ |
