上次返香港探親，其中一個最重要的行程就係返去做物理治療。始終做嘢對得mon多，姿勢不自然，久而久之一定有勞損。但其實列斯都有一位香港人物理治療師，唔單止喺英國註冊，曾經喺NHS打工，而且仲收得唔貴，每次療程只係收£65，包括針炙、電療及手法治療等服務，老實講仲平過香港，所以我哋今次專程去到佢診所訪問佢，等各位街坊有多一個選擇。
今次介紹呢位物理治療師Alan，診所位於列斯市中心一幢商業大廈內。入到去，大家用廣東話打招呼，第一個印象就係佢肯定可以幫到好多好似我呢類需要做物理治療嘅人。老實講，雖然NHS都有物理治療服務，但要我用英文形容個膊頭點樣「赤赤痛、冤冤痛，扯住扯住痛」，結果就真係只係識講「Pain」，咁就梗係醫唔好。所以，Alan識講廣東話，真係非常幫到手。
Alan今年大約三十幾歲，外表十分斯文。佢早喺十七歲就嚟到英國讀書，後嚟喺列斯讀大學，修讀物理治療。2016年畢業後就直接入咗NHS做咗七年，三年前轉咗去私人執業，至去年十二月終於開設咗呢間物理治療中心「RehabWell 360 Physiotherapy and Healthcare」。所以，雖然外表睇唔出，但佢其實已經有十年經驗。
「際遇鋪好晒」
計一計時間，2016年仲未出現移民潮，相信好多香港人喺英國讀完醫，都會返香港執業。眾所周知，英國醫護人員近年經常罷工，原因不外乎人工低。返香港執業的話，收入點都好過喺英國。咁點解當年Alan會選擇留低？
佢話，其實「際遇鋪好晒」。當時佢的確有諗過返香港，但畢業前半年，大學鼓勵學生試吓喺英國搵工，因當時醫護人員申請工作簽證比較容易，結果佢喺列斯實習嘅醫院就請咗佢，五年後就順理成章留低入籍。後來仲喺呢度識咗佢太太，建立咗家庭，加上2019年香港發生嘅「反送中運動」，成為佢心態上嘅轉捩點，就更加唔會考慮返香港了。
近年，英國NHS的服務一直為人詬病，作為一位曾經喺NHS工作嘅物理治療師又點睇呢？
Alan表示，相比起香港醫療體制那種流水式、而且輪候時間極長，往往「等到唔痛先睇到」的服務，英國NHS本身係一個非常好嘅服務，尤其係對一啲有長期病患或者有重病嘅人，會俾空間、時間，會由病人的角度出發，問題只係NHS已經「爆煲」，資源不足、人手不足，非前線員工可以解決，唔係唔想做，只係無能為力。尤其係COVID後，民眾對醫療期望提高、體諒減少，就更加難做了。
目前NHS著重「自我康復」，即透過電郵、視像睇症，要求病人自律做復康療程，隔四、五個星期才覆診。但Alan坦言，物理治療當中如拍骨、針炙及電療等療程就好難提供了。
復康療程
講返Alan提供嘅服務，佢表示，大約八成為痛症處理，主打運動受傷、勞損、慢性痛症復康。每次療程約四十五分鐘至一小時。經過評估後，佢會用唔同嘅方法，包括針炙、電療、手法治療（即係拍骨及正骨等方法）進行診治，然後會教病人做復康運動、拉筋、姿勢改善等，以防止痛症復發。
另外，佢亦會提供老人復康、術後復康、腦神經復康（中風、柏金遜等）等服務。老實講，英國有啲香港人長者未必講英文講得好好，咁Alan應該係一個好好嘅選擇。
我聽完佢介紹之後，最有興趣係針炙，因為我真係喺Wakefield搵過一位中醫師做針炙，醫我嘅肩周炎問題。我好奇嘅係原來英國都有得讀針炙咩？Alan解釋，其實西方醫學有所謂「乾針」，與中醫從穴位角度為主的方法不同，主要用來處理因肌肉繃緊而影響的痛症。不過佢亦都有自行進修中醫那一套方法，所以在治療上會兩套方法都用。
咁我諗大家關心嘅另一個問題，就係收費。相信大家都知，喺英國睇跌打一啲都唔平，而且每個項目逐樣計。而Alan嘅收費就係每次唔理你需要做幾多樣療程，都係收£65，每次約四十五分鐘至一小時，通常預早幾日就約到，唔使好似NHS咁等成個月。老實講，呢個收費真係唔算貴。
今次嚟訪問Alan，除咗佢物理治療師嘅身份之外，另一個原因，其實佢本身係一個好關心香港人社群嘅先行者。早喺五年前陸續有香港人嚟到英國，佢已經開始發起聚會，約大家出嚟食飯、甚至去佢屋企燒烤同玩Board Game，喺網上群組上，會解答初嚟報道嘅香港人的問題。我喺呢個訪問之前其實已經聽聞過佢嘅事蹟，一個有心凝聚大家嘅人，我哋冇理由唔好好支持。
嚟到英國定居，我相信大家都會出現「身分認同感」嘅問題。到底自己是香港人、還是英國人？特別是我們的下一代，在英國長大，很可能已經不太懂得講廣東話了。所以我很認同Alan的做法：凝聚港人，讓大家更能融入這個社會。「此心安處是吾鄉」，我相信這就是我們這群人的寫照。
| RehabWell 360 Physiotherapy and Healthcare |
| 地址： C26 Joseph’s Well, Hanover Walk, Leeds, LS3 1AB |
| 電話： 07379 879376 |
| 網址：https://rehabwell360.co.uk/ |
