相信住喺列斯嘅香港人，都知道依家Kirkgate Market 有唔少香港人開嘅鋪頭，當中仲有一間港人迷仔超巿「HMK 雜貨店」。但唔講唔知，其實HMK 雜貨店已經開咗三年半，係Kirkgate Market 入面第一間香港人店。近來，佢哋終於有自己嘅網上商店，仲會有啲新搞作。作為列斯人，梗係要走去八吓，睇吓佢哋點樣喺愈開愈多嘅網上商店巿場中突圍而出。
記得初嚟到列斯定居，香港人並唔算多，始終列斯並唔係香港人嘅熱門選擇。有時行街撞到其他香港人，唔識嘅都會點吓頭。後來有次去Kirkgate Market，竟然見到有個香港人啱啱開鋪賣港式雜貨。除咗有他鄉遇故知嘅感覺外，仲覺得呢條友真係夠薑，明明列斯冇咩香港人，當時佢哋賣嘅貨品款式仲唔算多，列斯仲有大大間中超成記喺度，心諗你點做得住呀？
後來吹水吹得多，識咗呢位老闆Ivan。其他Kirkgate Market嘅朋友仲俾咗個稱號佢，叫佢「Kirkgate Market 林家謙」。我覺得點解大家會咁叫佢，除咗佢個樣真係有啲似之外，主要都多少有啲恭維。除咗佢係第一間，曾經幫過其他有志喺Kirkgate Market創業嘅朋友外，最重要係佢一直睇住Kirkgate Market，以至香港人族群喺列斯嘅成長同變遷。你喺佢口中，會聽到聽唔完嘅香港人故事。
Ivan話，其實佢以前喺香港完全唔係做呢類生意。佢嚟咗英國後，有次去Rightmove搵屋，忽然見到有兩個喺Kirkgate Market嘅頂讓盤。當時佢忽發奇想，諗吓不如開返間鋪賣吓精品？後來佢同Kirkgate Market 聯絡，先發覺唔使頂手，可以直接租一個檔口。於是，當時佢就同Council傾，盲摸摸咁寫完一輪proposal搞完一大輪手續，終於喺Market嘅中間位置開咗舊鋪，諗住賣吓啲香港人雜貨外，主力賣日本精品。
當然，過程一啲都唔順利。到生意做落咗，知道有咩客巿場要乜後，先慢慢fine tune，搵到生存嘅空間。後來佢仲攞到依家近Food Court 嘅鋪位，地方又大咗，貨物種類又多左，其實同佢三年半前剛剛開業時相比，已經好唔同。依家嘅HMK雜貨店已經係一間迷你超級巿場。基本上香港人平時會買開嘅嘢都會喺呢度搵到，甚至一啲少見啲嘅，例如今期有小杜良品，都可以喺度直接買返屋企。到依家，顧客已經唔再只係香港人，本地人顧客已經佔咗一半。
喺Kirkgate Market三年半，佢話見證咗好多變遷，最大得著係識咗好多朋友。因佢哋只係一間小店，冇能力請人，得Ivan一個人看舖，好難行開去洗手間，但認識咗一班好好嘅香港人，有需要時佢哋會幫手看住舖頭，他笑言好感激一班幫他「當尿更」嘅香港人。其實佢間鋪經常有班香港人喺度同佢傾偈，可見呢度已經成為部分香港人嘅聚腳地。
事實上，近幾年，Kirkgate Market嘅香港人店愈開愈多，特別係食肆。Ivan話其實有啲朋友未開鋪之前，都會請教佢點樣可以喺呢個market開鋪。不過佢話，其實呢兩年Kirkgate Market嘅人流並唔係好似Council講得咁好，而係一直減少，生意難做了，所以如果大家都考慮緊喺market開鋪，就真係要三思。
對於佢嚟講，依家除咗人流嘅問題外，另一個最大問題係Market唔知道會裝修到幾時。事實上，Market一直都修葺緊，上年開始，佢旁邊嘅其中一條主通道封咗，估計要封一年，要到今年八至十一月先開返，但仲未知會唔會delay。依家顧客要經過魚檔先可以兜入佢間鋪，令佢嘅生意有好大影響。所以半年前，佢終於決定開網上商店，希望可以搵到出路。
但其實，依家賣香港嘢嘅網上商店已經有太多，好多熱門貨品，例如即食麵，價錢已鬥到幾乎無利可圖。所以Ivan話，未來佢哋嘅網店會開始賣一啲比較少見，同埋未必啱喺地鋪賣嘅貨品，例如日本精品等。而事實上，因為佢有門巿，可以俾人睇到件貨，其實係有佢自己嘅優勢。套用以前讀online marketing嘅術語，依家網上加網下先係王道。佢哋嘅網站可以發展到咩程度，就要靠大家支持了。
事實上，HMK雜貨店一向都好支持香港人，你可以喺佢度見到好多香港人嘅傳單，好似理髮服務、港式糕店等。記得上年《種子新聞》剛剛開始營運，完全冇人識，佢二話不說就幫我哋貼宣傳品，仲幫我哋搞宣傳活動。到依家我哋終於喺列斯有啲人認識，所以對佢實在無言感激。我相信，當大家嚟呢個新環境後，會明白其人他伸手去幫你並唔係義務，如果一個人真係無條件咁幫你，背後一定有啲金錢以外嘅理想。我諗單係呢一點，就值得大家支持呢間香港人店。
題外話1：就快農曆新年，但HMK雜貨店會如常營業。佢哋依家仲有揮春賣，想辦年貨快啲去搵佢啦。
題外話2：同Ivan吹水吹咗幾年，到近來先知道原來佢係我小學校友。人嘅際遇就係咁神奇，亦令我明白，人與人之間係需要互相connect，如果你想去搵個connecting hub，或者可以好似我咁，走同Ivan吹吓水。
| HMK 雜貨店 |
| 地址：Unit BS1, Kirkgate Market, Leeds（即係food court中間條巷行入去，魚檔生蠔店隔離） |
| 營業時間：星期一至六 10:00 – 17:30 （星期日休息） |
| FB：https://www.facebook.com/profile.php?id=100085052618472 |
| 網上商店網址：https://hmk-store.com/ |
